Pajau Media
September 19, 2024
Putao hkrun lam hpaw ai shata mi pyi n rai shi yang September hpang jahtum bat maga de kalang bai pat na lam shiga ni mawng wa ai majaw ginra masha ni grai myit tsang nga ma ai lam chye lu ai.
Hkrun lam mahkrai hten za mat ai hpang bai mai hkawm ai kade n na shi ai aten lam bai pat kau na lam shiga ni mawng wa ai re hte ya aten gunrai mawdaw kaji ni lai wa ai majaw kaga gunrai manu ni n yawm tim Jak Sau manu ni gaw loi li yawm wa ai re. Kalang bai lam pat na nga yang gaw grai yak sai nga nna Putao ginra masha tsun ai kawn chye lu ai.
“Ya she gunrai manu ni loi li hkrat wa ai maga rai wa ai kaw kalang bai pat na lam shiga ni bai mawng wa, Dai pyi mawdaw kaji ni sha law lai hkawm ai, kalang bai lam pat mat yang gaw anhte Putao ginra masha ni grai yak sai ga re,” nga nna tsun ai re.
Ya aten Myen hpyen dap gaw Jinghpaw Mung ginra kata hpyen n-gun jat shamu shamawt ai lam ni galaw nga ai re hte n dai laman Sumpra Bum maga de hpyen shamu shamawt ai lam ni mu lu ai hte n dai masa hpe yu yang kalang bai gasat gala majan sawng wa mai ai lam ginra masha ni tsun maram da ai.
“Ya kalang bai lam pat na nga yang gaw Myitkyina-Putao lam lapran gasat gala majan laja wa mai ai, ndai laman Myitkyina maga kaw na Sumpra Bum de hpyen n-gun jat htu shadut ai lam ni mu lu ai. Sumpyi Yang mare masha ni mung koi yen taw ai hte dai kaw Myen hpyen dap dap jung ai re majaw Putao hkrun lam mayan gaw shim lam n nga sai, gasat gala majan masa a majaw pat na sha mai byin ai, gara hpung ni pat na re ngu gaw n chye ai.”
Putao-Myitkyina hkrun lam gaw 2024 shaning n nan daw kaw nna gasat gala majan a majaw hpaw dat pat dat rai nga ai re hte hkrun lam mayak a majaw ginra kata de mung shawng daw de kalang mung n byin yu ai shadawn shawdang hte gunrai manu ni ladu lai tsaw lung ai mayak ni hkrum sha wa sai re hte N-gu malu masha taw ai mayak ni hkrum sha mat ai re. Dai hpang kaw nna Putao ginra kata gunrai manu yawm wa ai lam n nga mat ai gaw ya aten du hkra re hpe mung chye lu ai.
Shiga - Mali Hku
Kommentare