Pajau Media
12th, March, 2025
Putao muklum, Tukdang lawk hta asak nhpring ai Shy. Gum Ring Du Naw (15) ning hpe roi rip sat kau ai wa hpe amu lahkawng hte și ari jahkrat ai lam Nya Pyi Daw de hkan nang ai Putao ginjaw tara rung Tara Agyi kawn chye lu ai nga nna ginra masha langai tsun ai.
Tara tawt lai ai wa gaw asak 24 ning ram re ai Kyaw Thu Ra Ko rai nna lai wa sai 2024 ning August shata 6 ya shani Putao tara rung hta asak nhpring ai hpe roi rip ai amu, masha sat ai amu hte lagu lagut ai amu ni hte si ari jahkrat hkrum ai lam chye lu ai.
“Ya na zawn tara tawt lai ai ni anhte na PutaO ginra hta hpang de bai nbyin na matu mung, lam madun ai hku mung byin hkra ndai amu hpe lawan dik ai hku si ari jaw ra ai. Nrai yang anhte ginra hta shimlum lam nnga wa ai. Lai wa sai 10 ning laman moi Shawng de nbyin ga ai masha sat ai, lagu ai, kasun ai amu ni mung grai law wa nga,” nga nna sat hkrum ai wa hte ni htep ai slg kawn tsun ai re.
Asak nhpring ai hpe roi rip ai amu hte masha sat ai amu lahkawng hte PutaO ginjaw țara rung kawn si ari jaw da ai hpe Nay Pyi Daw tara rung hta bai mara shayawm na matu tang shawn ai rai tim Nay Pyi Daw tara rung kawn dai ni si ari bai jahkrat ai re. Ya jahkrat da ai ari gaw tara tawt lai ai wa hte ging dan ai ari rai ai re hte lawan dik ai hku tara jeyang shangun mayu ai lam sat hkrum ai Shy. Gum Ring Du Naw maga na jinghku langai tsun ai re.
Mabyin gaw lai wa sai 2024 ning May shata 10 ya shani Putao, Tukdang lawk hta steel hte hpri arung arai galaw dut ai seng hta bungli galaw ai Kyaw Thu Ra Ko kawn asak 15 ning re ai Shy. Gum Ring Du Naw hpe roi rip sat kau ai re.
Shiga - Mali Hku
Comments