Pajau Media
27.9.2024
Jinghpaw mung kata Phone Internet line pat da ai shata lahkawng na wa sai rai nna Putao ginra hta mung Starlink Wifi seng langai hpaw hpang wa sai raitim manu tsaw ai majaw ginra masha ni yawng lu lang na matu yak hkak ai masa re lam chye lu ai.
“Nbungli Daru lawk (2) kaw internet seng langai gaw hpaw nga sai. Hkying hkum mi kaw 20,000 jaw ra ai, masha mung grai law ai, grai la na she lu lang ai, manu mung bai hpu, grai ahkyak ai bungli a matu sha nrai yang lu lang na matu n loi ai,” nga nna NGO magam gun ginra masha tsun ai.
Phone matut mahkai lam pat da ai shata lahkawng laman Putao ginra hta MPT gaw tsep kawp n mai shaga ai madang rai nna Oredoo, MEC Phone line gaw shara ra hta mai shaga ai re hte n dai laman Muklum kata shara n kau hta Atom Phone gaw mai shaga ai hte yup tung aten hkan kalang marang Internet mai lang ai lam ginra masha ni tsun ai kaw na chye lu ai.
Putao ginra kata Internet seng langai hpaw wa sai raitim ahkaw ahkang lu ai Sut hpaga masha ni galaw sha ai hpaga langai hku sha mu mada ai, Ginra masha ni a matu myit yang yawng mai byin ai masa hta jai lang lu hkra manu loi shayawm nna hpaw na hpe ginra masha ni ra sharawng ai lam tsun da ai re.
Shiga – Mali HKu
Comments