Putao Hkyen Bum Shara Ni Hta Dai Ning Ginghtawng Ta Laman Hkyen Bum Lung Ai Bu Hkawm Manam Ni Nnga Ai Daram Yawm Mat Nga

Pajau Media

14 March 2025

Jinghaw mungdaw na mying kaba ai shara langai rai nga ai Putao hkyen bum shara ni hta dai ning ginghtawng ta laman hkyen bum lung ai bu hkawm manam ni nnga ai daram yawm mat ai hpe hkyen bum lung lam woi galaw ai ni kawn tsun ai.

“Dai ning gaw shawoi shaning na hta grau sawng mat sai. Bungli nbyin sai. 2024 shaning hkan lam ni pat mat tim hkyen bum lung bu hkawm manam ni naw nga ai. Dai ning hkan gaw nnga ai daram rai mat sai,” nga nna bu hkawm bungli galaw taw ai masha langai tsun ai.

Myen mung dingda maga de nga ai Putao hkyen bum ginra gaw nshung ta htum ginghtawng ta kawn hpang nna hkyen bum lung ai bu hkawm masha ni sa du wam ai ginra langai rai ai hta sha n-ga bu hkawm masha ni mung sa du wam na matu myit shang sha ai shara langai re.

Ginra masha ni tsun ai hta dai ning laman sa du wam ai masha nnga ai daram rai mat nna hkyen bum lung lam madun ai bungli galaw sha ai ginra masha nkau mung shang gunhpraw lam pat mat ai lam tsun ai.

“Mung masa nkaja ai rai timung Putao maga de gaw nbungli hte hkawm sa mai ai, raitim gunrai manu ni tsep kawp n-yawm ai sha tsaw she tsaw wa ai na majaw rai na re,” nga nna lahta na ginra masha bai matut tsun ai.

Moi Covid-19 hte Myen hpyen dap kawn daru magam nzing shi ai shaloi ten du hkra Puta-o ginra de hkyen bum lung bu hkawm ai masha law law shara shagu kaw na du sa ai hte ginghtawng ta du ten hta masha law law sa du wam lai wa sai raitim ya aten hta masa galai mat sai nga nna tsun ai.

Putao ginra de bu hkawm ai masha ni law malawng sa du chyai ai hkyen bum ni gaw Hpung Yin, Hpung Kan Razi, Shan Hkawng ginra hte Hkakaborazi hkyen bum maga de law malawng sa du chyai ai re lam chye lu ai.

Shiga – Mali Hku