Pajau Media Channel
3rd June, 2024
Putao ginra hkawm sa hkrun lam lai wa sai March shata kawn pat mat ai majaw gunrai htaw ginlen ai lam tsep kawp hkring mat ai gaw ya aten du hkra re hte lam shagu grai ginchyum chyat yak hkak nga ai sha n-ga dai ning gaw ginra kata na pru ai Grapefruit si dut mari ai lam grai hkrat yawm mat ai hta sum machyi ai lam hkrum katut nga ai re.
“Daining laman jahting da ai Grapefruit si ni gaw yawng hten ai hte sum sai ga re. Myitkyina de htaw shalai mung n mai, n dai kaw mung nlu dut rai, anhte mari jahting ai ten gaw nam si hkum mi kaw lap (400) tsa hte dut mari hpaga galaw ai ni kaw na mari la da ai re. Ya gaw dut pyi n lu dut shi yang yawng yat na hten wa sai. Dai ning gaw sum machyi kaba re sai,” nga nna namsi mari dut nga ai mung masha langai tsun ai.
Putao na pru ai Grapefruit si hpe Myitkyina de madung htaw shalai dut sha nga ai re. Myitkyina ginra hta Grapefruit si hkum mi hta lap (1,000) mi kaw nna lap (1,500) du hkra mai lu ai re hpe mung chye lu ai. Shaning shagu Putao kaw na Grapefruit si hpe shaning shagu Tan hku nna dut shalai, mari nga ai re raitim dai ning gaw nbungli hkrun lam sha nga ai re majaw nam si ni hpe Myitkyina de n mai htaw shalai mat ai hta grai sum machyi nga ma ai re.
“Lai wa sai aten hkan gaw Grapefruit si hpe shata masum mali daram jahting da nna bai dut sha yang manu grai lu ai. N nan dut sha wa ai aten namsi hkum mi hta lap 300 daram hte lu ai. Shata lam bai jahting da yang manu tsaw ai hku mai dut sha ai. Dai ning gaw sum kaba re. Shawoi shaning gaw n lu dut ai nga tim hkauna galaw sha na manu daram gaw lu ai re. Dai ning gaw hpa nan nlu sai,” nga nna Grapefruit sun galaw ai mung masha tsun ai.
Grapefruit si hpe December, January shata daram kaw nna May shata htum daram du hkra mari, dut shalai ai nga ma ai re. Dai ning gaw Grapefruit gat lawk nan n nga mat ai madang byin nga ai re. Mari jahting da ai namsi ni yawng hten mat ai hta grau nna hkrun lam yawng pat mat ai shata masum daram na wa sai hte Putao ginra de gunrai htaw shalai ai lam tsep kawp hkring mat ai majaw ya aten Putao ginra masha ni lam shagu grai yak hkak jam jau nga ma ai re hpe mung chye lu ai.
Shiga – Mali Hku
Comments