Pajau Media Channel
10th July, 2024
June shata htum kaw nna marang matut manoi htu sawng ai hte Bum hka ni kaba wa ai gaw Mali hka de wa zup ai majaw Hka hpyen hkrum ai lam, hkrun lam, Mahkrai ni hten za taw nga ai sha n-ga ya aten du hkra marang naw n zim shi ai re majaw Hkauna mam ni hten za wa na madang byin nga ai re.
“shawng na bat kaw nna mali hka hte hka shi kasha ni kaba wa ai majaw shara shagu ngu na daram hkrun lam mahkrai ni hten za nga ai re, dai ni pyi n lu gram shi ai, marang gaw matut manoi bai htu nga ai re majaw kalang bai hka kaba wa sai, n dai masa hku sha rai yang Hka mayan na Hkauna ni gaw hten za law na masa nga ai ” lam Machyang Baw ginra Hkauna galaw sha Mung masha langai tsun ai.
Putao ginra hta July praw 7 ya kaw nna 9 ya shani du hkra marang matut manoi htu sawng ai majaw ya aten mali hka bai kaba jat wa nga ai re, ya aten gaw Hkauna hkai ta re hte Hka matut manoi kaba ai majaw hkauna hkai ai lam yak hkak nga ma ai hpe mung chye lu ai.
July praw hta marang matut manoi htu ai majaw Mali hka Kaba lung wa nna Putao ginra Hkrun lam, mahkrai ni hten za hkrum ai gaw shawoi shaning na hta grau sawng nga ai re hpe mung chye lu ai. Ya aten Putao Hkawng Lang Hpu hkawm sa hkrun lam mung hten za mat ai sha n-ga Myitkyina Putao hkrun lam lapran Lam nawng gyi ru nna hkrun lam hkawm mawdaw law law mung chyat nga ai re hpe mung chye lu ai.
Shiga- Mali hku
Comentários