Pajau Media
1.29.2025
Putao ginra kaw na pru ai shingra nam si nam saw langai rai nga ai Grapefruit manu gaw laning hte laning manu yawm wa ai re lam ginra masha ni tsun nga ma ai re.
Ya na zawn manu nlu wa ai masa hpe ginra masha ni tsun ai hta “Dai ning gaw Putao muklum kaw nga yang nam si hkum mi kaw 500 pyi n lu sai, mari ai manu gaw 300 jaw ra ai. Dai kaw she htaw manu pyi n bai ai law law re. Myitkyina de htaw na nga yang mung langai mi kaw 150 manu hku na ahkun jaw ra ai. Buri buk mi kaw mun mi jan daram ang mat yang gaw hpa n ngam ai le. Myitkyina kaw mung moi na zawn bai n lu dut mat sai,” nga nna tsun ai re.
Putao kaw na Grapefruit hpe gaw Myitkyina muklum de madung htaw shalai dut sha ai raitim Myitkyina muklum kaw mung dai ning gaw Grapefruit langai mi kaw lap 1,000 kaw na 1,500 daram du hkra sha manu lu ai re hpe mung chye lu ai.
Putao ginra na pru ai madung shingra nam si Grapefruit hpe Jinghpaw mung kata na mung masha ni sha n-ga Maigan de du hkra Putao kumhpa hku nna shagun jaw ai lam ni nga ai re.
Dai ning hkan na gaw ginra kata Mung masa a majaw byin nga ai hkrun lam mayak hta htaw wa htaw sa lam ni grai yak hkak mat ai hte manu ni grai yawm wa ai rai nna n lu htaw shalai la ai sha sum machyi mat ai lam law law re hpe mung chye lu ai.
Putao ginra kata Grapefruit hkai sha ai ni mung nam si manu n lu ai majaw dut lu dut sha lam ni moi na ram n kaja sai re. Ya na zawn Grapefruit manu yawm wa ai gaw lahkawng ning daram rai wa sai re.
Lai wa sai 2024 shaning hta mung Putao-Myitkyina hkrun lam pat mat ai hta gunrai htaw shalai lam hkring mat ai hte hkrun lam hpaw wa ai aten hta mung lam lapran htaw manu, jaw ra ai ahkun ni law wa ai a majaw dut mari ai lam hta shawoi na zawn atsawm n lu dut mat ai re hpe mung chye lu ai.
Shiga – Mali Hku
Comments