Putao Ginra Kata Jak Sau, N-Gu Ni Hpe Manu Hkyem Sa Ai Hte Dut Shabra Hpang Nga Sai Lam

Pajau Media

30.9.2024

Putao ginra kata gunrai manu ladu lai tsaw mat ai hpang Mung masha ni grai yak hkak wa ai masa hpe hparan lu na matu ginra Uhpung uhpawng ni kawn Jak Sau, N-gu buk law law htaw shalai la nna manu hkyem sa ai hku dut shabra ya ai lam hpe September hpang jahtum bat kaw nna galaw hpang nga sai lam chye lu ai.

Ginra kata sut hpaga galaw ai masha ni gaw hkrun lam mayak a majaw gunrai pru shang lam yawm wa ai masa hta gunrai manu ni hpe ladu lai shatsaw nna dut sha nga ai hpe shayawm kau na hte ginra kata gat lawk rap ra shangun mayu ai.

Yak hkak nga ai ginra Mung masha ni hpe maga mi hku nna garum madi shadaw lu na matu yaw shada ai majaw Disel pepar 1,000, N-gu Buk 2,000 hpe shadu la lu sai lam ginra Uhpung uhpawng hte gindun ai masha langai tsun ai.

“Gunrai manu ni hpe manu hkyem sa ai hku mari lu, mari lang na matu re, ya jak sau hte N-gu buk ni hpe Tuk Tan Lawk Rawang htinghking manau wang kaw dut shabra ya nga sai. N dai masing hpe lai wa sai August shata daram kaw nna galaw hpang nga sai raitim hkrun lam yak ai majaw aten grai na mat ai”nga nna tsun ai.

Ya aten Putao ginra kata N-gu buk mi hpe 250,000 kaw nna 300,000 lapran nga ai re, raitim ginra Uhpung Uhpawng ni gaw n-gu buk mi hpe sen lahkawng npu hte dut shabra ya nga ai lam, ginra kata grai nan yak hkak ai Mung masha ni hpe gaw garum madi shadaw ai lam ni mung galaw ai re lam mung chye lu ai.

“ginra uhpung uhpawng ni kawn ya na zawn galaw ai marang e yak hkak nga ai mung masha ni kaji mi sha pyi hkyem sa nah pe myit mada ai, ginra kata Gat lawk gunrai manu ni ladu lai shatsaw nna dut sha taw ai Sut masa hpe rap ra hkra galaw na matu shakut nga ai lam re”

Ginra komiti Hpung hta Putao ginra nga Nawku makam masham hte amyu sha Uhpung Uhpawng, Hpung (7) shang lawm ai hpung re hpe mung chye lu ai. ginra kata na Uhpung Uhpawng ni shang lawm ai hpung hpe lai wa sai June shata kaw nna hpaw shabawn hpang sai re hte ginra asuya, garum ningtum Uhpung uhpawng ni hte gindun bungli galaw nga ai re hpe mung chye lu ai. Komiti rung hpe Putao Muklum kata July shata daram kaw nna hpaw hpang nga sai lam shi sawk Mali hku Tang madun da ai.