Pajau Media Channel
2nd May, 2024
Jak sau manu rawt nga ai masa hte jak sau taw ai putao ginra hta n dai shata kaw nna gaw hkauna galaw sha ai mung masha ni hkauna bungli shang ra ai rai nna myit ru myit tsang nga ai aten Jinghpaw mung hkringmang daju kawn jak sau hpe manu hkyem sa ai hku dut ya na lam tsun wa ai re hpe mung chye lu ai.
Jingghpaw Mung hkringmang daju hte asuya hpung ni gaw April 30 ya shani Putao ginra de sa du nna jak sau taw ai majaw hkauna bungli n lu galaw shi ai mung masha ni a mayak hpe hparan ya ai hku nna jak sau hpe nbungli lam hku htaw shalai nna manu hkyem sa ai hku dut ya na re hte jak sau dut ya ai lam hpe hkauna lamu ga eka masa hpe yu nna dut ya na re lam jinghpaw mung hkringmang daju tsun ai hpe ginra masha ni ya na zawn tsun dan ai re.
“ n dai bat laman hta jak sau pe par 1,000 daram dut ya na re nga tsun ai, nbungli hte htaw na re lam tsun ai. Mani YX hpyen n bungli hpan langai kalang sa ai, dai hpawt daw hta mung kalang sa ai, gara manu hku dut ya na re ngu hpe gaw tup hkrak n lu tsun ai, hkauna Lamu ga eka kade galaw ai ngu jahpan ni hpe tinang na lawk salang, mare uphkang rung ni de jahpan wa jaw ra na re, mani kaw nna uphkang rung kaw masha grai law hkra mahkawng nna gashun gashe mying jahpan wa bang nga ma sai, sau chyawm n jahkrat ya shi ai”
N dai shiga hte seng nna mare kahtawng hkan na hkauna galaw ai mung masha n kau gaw myit tsang nga ma ai re, Putao ginra ting na hkauna galaw sha ai mung masha ni yawng gu ra hku gaw n lu shalai ya na re, nbungli hkrun lam langai hte sha tang du hkra nlu galaw ai, masa amyu myu a majaw n dai masing n byin wa na hpe myit tsang nga ai lam ya na zawn matut tsun ai.
“ Putao ginra ting hpe gu hkra galaw na matu gaw n bungli hkrun lam langai hte sha n law ai, shanhte hku nna mung masa gasup mayu ai majaw galaw ai re ngu mung mu mada ai, muklum kata hkan nga ai mung masha ni hpe pyi ya du hkra n lu galaw shi ai gaw mare kahtawng hkan na mung masha ni hpang de du na gaw n loi ai, mawdaw hkrun lam sha n hpaw dingsa ginra masha ni grai yak hkak na masa nga ai” nga nna ginra masha tsun ai.
Myitkyina-Putao mawdaw hkrun lam hpe hpyen majan a majaw pat da ai shata lahkawng daram du wa sai rai nna ginra masha ni hkau na bungli shang na aten wa jak sau gaw yak hkak nga ai hte gunrai taw wa ai lam, manu ladu lai tsaw nga ai majaw Putao ginra masha ni grai yak hkak ai masa hkrum sha nga ai re hpe mung chye lu ai.
Shiga - Mali hku
Commentaires