Pajau Media
8. 8. 2024
Putao ginra sinpraw hkran daw de nga ai mung masha ni gaw bum yi hpe kan bau bungli hku galaw sha ai re hte dai ning gaw “Yu” grai sha ai mayak ni hkrum katut nga ai lam ginra masha ni tsun ai.
“N dai de gaw bum yi hta lai na kaga galaw sha na n nga ai. Ya aten gaw mam pru wa sai. U ni grai sha ai, dai kaw Yu bai grai sha rai na grai myit ru ai. U hpe gaw shachyut kau mai ai. Yu hpe gaw gara hku mung n mai galaw, Yu hkam kau na mung arai ni Putao myo de bai sa mari ra, sa mari na mung lam yak ai majaw n lu sa ai” nga nna ginra masha tsun ai re.
Bum de nga ai mung masha ni gaw shaning shagu bum yi galaw sha ai rai nna bum yi mam pru shadang gaw laning hte laning grai yawm wa ai lam tsun ai. Dai ning gaw shawng shaning na hta grau yak na masa nga ai hte Yu gaw Hkai n mai yawng hpe nan lu jahten ai re majaw shawoi shaning na hta grau yak hkak wa mai ai lam chye lu ai.
Lanam ladaw shang ai hte marang ladu lai htu sawng ai majaw Putao sinpraw hkran ginra Dinghkyet, Ding Ga, Marawt hte dai ginra de hkawm sa hkrun lam ni n gam gyi nna lam hten mat ai hpang bai n lu gram la shi ai lam chye lu ai. Lai wa sai ten hta gaw lagaw lam sha hkawm ai re, raitim cycle lam mai hkawm hkra masha n-gun hte lam htu la da ai re.
Dai ginra na masha ni gaw Jum, Sau hte kaga dinghku lang arai ni kaw na hkawt Myo de na sha htaw la ra ai re hte dai ning gaw manu ni grai tsaw ai majaw n lu mari mat ai madang byin nga ai re hpe mung chye lu ai. Dai ning gaw hkrun lam mayak a majaw Putao muklum de mung gunrai n shang ai sha n-ga nga taw ai gunrai manu ni mung grai tsaw mat ai re. Dai ning gaw Putao sinpraw hkran ginra na mung masha ni dai ning laman malu masha grai yak hkak na masa nga ai lam chye lu ai.
Comentários