Pajau Media Channel
10th April, 2024
Putao hkawm sa hkrun lam pat tawn da ai shata mi jan wa sai hte putao ginra hta gunrai htaw shalai ai lam gaw tsep kawp hkring mat ai majaw ya aten ginra kata shani shagu na lu sha gunrai manu ni shawoi na hta htam masum daram tsaw lung wa ai majaw ginra masha ni grai ginchyum chyat nga ai lam chye lu ai.
Ya aten Putao ginra kata n-gu manu hte kaga shani shagu na malu masha gunrai manu ni gaw shawoi na hta htam masum mali daram tsaw jat nga dingyang re hte ya aten na masa hpe Putao ginra masha langai tsun ai hta “Shani shagu lu sha gunrai hte seng nna Putao kaw gaw grai nan taw ai madang byin nga sai. Malu masha gunrai n kau gaw tam tim pyi n mu mat sai. Lai wa sai shata hta ginra kata kaw nna pru ai hkau na n-gu bye mi hta tsaw dik manu lap (4,600) nga ai, ya gaw lap (7,000) gaw yawm dik manu re sai. Mare kahtawng ni hkan gaw tam pyi n lu sai madang re. N-gun bye ( lawm ai pung mi hta mun manga jan nga sai, dai pyi grai tam yak mat sai.”
Hkrun lam naw hpaw nga ai aten hta gaw CP u-di hkum mi hta lap (200) nga ai raitim ya aten u-di hkum mi hta lap (1,500) jaw nna mari sha ra sai. Lawu ga de na shalai sha ai malu masha gunrai hte gaw gap arai ni hpe n dai laman hta shawoi na hta htam masum daram jaw nna mari lang ra ai sha n-ga shakau hpraw zawn re ai ni hpe joi hku n dut mat sai raitim hkum mi hta kade ngu ai masa hku she dut nga sai re lam ginra masha matut tsun dan ai. “Shakau hpraw, shakau hkyeng hte bahkri si ni hpe joi hku n dut mat sai. Hkum mi hku kade ngu ai hku sha dut mat sai. Shakau hpraw tawng masum hta lap (5,000), bahkri si hkum lahkawng kaw lap (5,000) jaw nna mari ra ai, bilat ga buk mi kaw mun matsat jan du sai.”
Putao ginra kata hta jak sau hte seng nna gaw grai taw nga ai masa rai nga sai hte April (10) ya shani na manu gaw 1 liter kaw lap mun mi jan du nga ai hte Diesel gaw tsep kawp n lu mat sai re lam mung chye lu ai. Lai wa sai March 7 ya kaw nna hpang ai htu shadut majan byin ai hpang Jinghpaw mung shara shagu de majan byin nga ai re hte Myitkyina-Putao hkrun lam Sumprabum ginra hta mung myo zing masing gasat nga ai majaw mawdaw hkrun lam pat tawn da ai shata mi jan nga sai re. N dai masa hta Putao ginra nga mung masha ni lam shagu hta grai ginchyum chyat nga sai re hpe mung chye lu ai.
Shiga- Mali hku
Comments