Pajau Media Channel
12th July, 2024
Putao ginra hta Jak sau taw nna manu hpu nga ai aten Lung Sawt Lawk kaw na Sau pump seng lahkawng kaw July 12 ya shani Hkying (9:00) Am aten kaw nna Manu hkyem sa ai hku dut shabra nga ai hta Mung masha hkying lam gashun gashe rai mari la nga ma ai lam chye lu ai.
Dut shabra ya nga ai sau seng ni gaw TINE KYAW Sau Pump hte Petro 7 Sau Pump seng ni kaw nna 1 liter kaw 10,000Ks hte masat nna dut ya nga ai re. Petro 7 gaw Putao ginra P.T.Ts Ningbaw Salang Tang Gu Tang madu ai Sau Pump re hpe mung chye lu ai.
“TINE KYAW sau seng kaw gaw marai langai / Cycle langai kaw Sau 1 liter Mun mi hte dut ya ai, Salang Tang Gu Tang madu ai Petro 7 sau seng kaw gaw Galan mi hpe Mun mali hte dut ya hpe gashun gashe she re, masha grai law ai majaw lu na matu nloi ai ” Ya aten dut shabra ya ai jak sau ni gaw hkrun lam gan hpaw ai aten du shang wa ai sau ngam ni hpe manu shayawm nna dut ya ai masa re lam sau seng kaw bungli galaw ai masha langai tsun ai re.
Hkrun lam pat ai shata masum laman jak sau hte gunrai manu ni gaw Putao ginra hta kalang pyi n du ga ai tsaw dik manu du mat ai re, June shata ka-ang daram hta hkrun lam bai hpaw wa ai kade n na ai hpang marang htu sawng ai majaw Myitkyina putao hkawm sa hkrun lam bai hten mat nna jak sau gunrai manu ni yawm ai lam n nga ai aten ya na zawn sau seng ni kawn manu shayawm nna dut ya nga ai masa re.
Myitkyina Putao hkrun lam htenza ai majaw lam lapran kaw gunrai htaw mawdaw law law chyat mat ai hte mawdaw n kau gaw putao de bai n htang mat ai ni nga ai, n kau gaw shawng de sit mung n mai, htingnut mung n mai rai nna lam lapran kaw chyat nga ai ni law law nga ai re lam mung chye lu ai. Ndai zawn re ai masa lam ni a majaw Putao ginra hta Jak sau ni taw mat ai madang byin nga ai hte ya aten shinggan sau seng hkan 1 liter kaw Mun Mali hte dut shabra nga ai re hpe mung chye lu ai.
Shiga- Mali Hku
Comments