Pajau Media Channel
18th April, 2024
Ya aten Putao ginra hta hkrun lam masa a majaw gunrai htaw shalai ai lam tsep kawp hkring mat nna jak sau manu ni, kaga lu sha gunrai manu ni mung ladu lai tsaw nga ai hta ginra kata na pru ai malu masha ni du hkra shawoi na hta htam masum daram manu tsaw lung nga ai re lam gat dut sha masha ni tsun ai.
Putao ginra na pru ai malu masha gunrai ni hte seng nna gat dut masha langai tsun ai hta “Shawoi lap 500 na n htan masum lu ai namlaw namlap ni, chying hkrang, hpagyi zawn re ai ni n htan mi lap 500 dut sha ra mat sai. Dai pyi arang n bai ai daram re. Majap kawk mi kaw moi gaw manga tsa re, ya gaw hkying masum du sai. Anhte gaw mare kahtawng kaw na cycle jawn let gat kaw sa dtu ai re, sau mung yawm htum mun lahkawng masum na sha n bang yang n law ai. Dai pyi dut ai shara n nga daram re. Ndai masa a majaw gunrai manu hpe shatsaw nna dut ra ai, dai pyi sum ai she malawng ai” nga nna gat dut masha ni tsun ai.
Putao ginra hta manap gat dut shara masum daram nga ai hte dai manap gat ni hta myo hte tsan ai mare kahtawng hkan na ni sa dut ai law malawng re hpe mung chye lu ai. Ya aten Putao-Myitkyina hkrun lam pat da ai shata mi jan wa ai hpang Putao ginra hta jak sau ni taw mat sai hte sau seng kaw nna bai la dut ai ni gaw sau 1 liter hta mun lahkawng du hkra bai dut sha ai re majaw ginra kata kaw na pru ai gunrai ni hpe mung manu shatsaw nna dut sha ra ai masa re lam gat dut masha ni tsun nga ma ai re.
Putao ginra kata mung masa mayak a majaw byin pru wa ai mayak ni lapran gat dut sha masha ni mung ram ram yawm wa ai re hte n dai masa hku aten na na rai wa yang Putao ginra nga masha ni hta malu masha grai yak hkak wa na masa nga ai lam hpe Mali Hku Tang madun da ai.
Shiga-Mali Hku
Comments