Putao ginra hta Mung shawa Hkam kaja lam hte seng nna asuya kawn atsawm lit la ai lam n nga ai majaw Mung masha yak hkak

Pajau Media Channel

16 February 2024

Putao ginra kata na tsi rung tsi gawk ni hte hkan Tsi sara, sara num n law ai mayak a majaw Mung shawa hkam ja lam hte seng nna makawp maga lam n lu ai majaw Mung masha ni yak hkak ai lam ginra masha ni tsun ai kaw na chye lu ai.

Myen mungdan masa galai shai wa ai hpang daw kaw nna Asuya magam gun law malawng gaw CDM galaw mat ai ni law wa ai re hte mare kahtawng hkan tsi gawk ni mung shi hte shi dawm mat ai majaw Mung shawa machyi makaw hkrum yang lawan ladan wa madun na tsi gawk ni n nga ai majaw tinang chye ai ladat hte tinang tsi gawn lajang la ra ai madang byin nga ai re hpe mung chye lu ai.

Ya aten na Putao ginra kata na Mung shawa hkamja lam hte seng nna lit la galaw ya ai daw hte seng nna Sara Num langai tsun ai hta “n dai hpang daw de gaw Ma hkum kanu ni hte Ma kaji ni a hkam kaja lam hte seng nna ana makawp tsi htu ya ai lam ni hpe shata lahkawng hta kalang daram sha lu galaw ya sai re,” nga nna Tsi sara num langai tsun ai re.

Myen hpyen dap Mungdan ahkang aya zing madu ai hpang kaw nna asuya hkam ja lam magam gun ni hkring mat ai majaw Hpyen dap tsi rung ni hte Mung shawa tsi rung ni gindun nna Mung shawa hkamja lam hte seng nna lit la galaw ya ai re raitim 2022 shaning htum wa maga kaw nna Mung shawa tsi rung kaw tsi tsi hkam la ahkaw ahkang pat kau ai re hpe mung chye lu ai.

“Putao ginwang kata Tsi Sara Wun, Tsi Sara Num n law ai, tsi rung tsi gawk shagu hta sara, sara num ni yawng gu hkra shara jahkrat na gaw grai yak mat ai masa re ”

Putao ginra hta Mung shawa hkam ja lam hte seng nna Hpyen dap tsi rung hpe sha kam hpa ra ai re hpe mung chye lu ai.Grau nna myo hte tsan ai mare kahtawng hkan na mung shawa ni hkam ja lam hte seng nna tsi gawn lajang lam nlu ai, machyi makaw byin shagu Hpyen dap tsi rung de du ra ai re.

Putao ginra 2024 shaning n nan daw kaw nna P.T.Ts hpung ni jep chyoi shara ni jat galaw wa ai majaw hkawm sa hkawm wa lam hta grai dut dang mat ai re, kajawng kaja tsi gawn lajang la ra ai Machyi masha ni hpe aten dep tsi rung sa na matu mung yak hkak dut dang ai lam ni byin hkrum ai re nga nna Mung masha ni tsun ai kaw na chye lu ai.

Shiga – Mali hku