Pajau Media Channel
19th March, 2024
Myitkyina Putao hkrun lam gasat gala majan a majaw hkawm sa hkrun lam pat tawn da ai bat mi daram rai wa sai re hte ya aten Putao ginra hta jak sau seng n kau gaw pat kau ra ai madang byin nga sai lam ginra nga masha ni tsun ai kaw na chye lu ai.
“Mawdaw sau bang na matu sa wa ai shaloi mawdaw langai kaw lap 30,000 na sha dut ya ai. Pung hte wa mari ai ni hpe mung marai langai kaw lap 20,000 na manu sha dut ya ai. Dai pyi sau seng shagu hta n lu ai. Ya aten sau seng madum ni hkan hta sha lu ai."
Jak sau hpe 1 liter hta lap (5,000) jaw nna mai lu ai raitim ya aten na masa hku nga yang mari shara pyi n nga ai madang byin nga sai re. Kade n na ai aten myo ting jak sau n lu ai mayak hkrum katut wa na hpe mung masha ni hkrit tsang nga ma ai re.
“Putao ginra na sau seng lahkawng rai nga ai Tai Kyaw hte Kyaw Zay Yar Min zawn re ai sau seng kaba ni hta pyi shadawn sharam nna she dut ya nga ai bat mi daram rai wa sai. Zay Yar Min Sau seng kaw gaw pung ni hte wa mari ai ni hpe nga yang pyi n dut ya mat sai. Mawdaw cycle ni hkan lap 20,000 na bang ya ai. Sau seng law malawng hkan gaw sau n nga ai daram re taw sai” nga nna ginra masha ni tsun ai re.
Putao ginra hta ya aten shani shagu na lu sha gunrai manu ni mung ladu lai tsaw lung wa ai re hte lu sha gunrai dut ai seng n kau hta dut na Udi pyi n nga ai daram byin nga sai lam hpe lawu na zawn tsun dan ai re. “Udi hkum mi hkying mi du nga sai. Dai ni hkan wa tam yu yang n nga taw sai. Nga joi mi hta mun lahkawng kaw na ya gaw mun lahkawng jan nga sai."
Hkrun lam lapran gasat gala majan laja nga ai majaw ya aten Putao ginra mawdaw hkrun lam ni pat tawn da ai rai nna n dai masa hpe aten galu hkrum sha ra na hpe ginra masha ni myit tsang nga ma ai re.
Shiga – Mali Hku
Comentarios