Pajau Media
27th April, 2024
Putao ginra hta gun rai hte jak sau manu ni gaw lani hte lani tsaw lung nga dingyang re hte ya aten jak sau ga lan 1 kaw sen mi du hkra tsaw lung nga sai lam ginra masha ni tsun ai kaw na chye lu ai.
Putao ginra hkau na galaw sha ai mung masha langai tsun ai hta “ lai wa sai bat laman hta gaw palin mi kaw mun hte dut ai re, dai pyi seng shagu kaw n lu ai, n kau gaw lagu lagyim re di dut ai rai nna grai chye hkat ai shada sha dut sha ai masa re, jak sau hpe law law la da na dut sha ai ni hku nna mung ginra masa hpe kachyi pyi n yu ai sha manu ni ladu lai shatsaw nna dut sha nga ai shanhte na majaw rai nga, seng ni hpe gaw pat da ti, bai dut sha nna masha ni hpe manu shatsaw nna bai dut sha, n dai masa a majaw jak sau gaw lani hte lani manu tsaw nga ai re. Lai wa sai 2018 shaloi mung kalang byin sai re sau taw ai mayak ” nga nna ginra masha langai tsun ai re.
Putao ginra hta ya aten disel pepar langai kaw sen mali shi du hkra manu lu nga ai re hte cycle sau gaw pepar kaw sen manga shi daram du hkra tsaw nga ai re lam, ya na zawn jak sau ladu lai tsaw lung nga ai masa hta Hkau na galaw sha masha ni hkau na galaw sha na matu pyi yak nga ai re lam chye lu ai. Mungdan kata byin nga ai gasat gala majan a majaw Putao ginra de hkrun lam pat mat ai shata lahkawng daram du wa sai re, ya aten du hkra mung Sumpra Bum ginra mayan de gasat gala majan masa gaw shaja hkat nga dingyang re lam mung chye lu ai.
Shiga -Mali Hku
Comments