Pajau Media Channel
Putao ginra nga Hka shi Hkanu ni hkan ja htu sha ai ni Jak kaba ni hte kam ai hku htu sha nga ai re hte n dai masa hku rai yang du wa na (5) ning daram hta Putao ginra shingra maka gaw yawng hten za wa na hpe ginra madu ni grai myit tsang nga ma ai re.
Myen mungdan masa lam a majaw kaga shang gumhpraw tam lu tam sha grai yak hkak wa ai hte ja maw ni law wa ai majaw ginra kata Gunrai manu ni mung ladu lai tsaw lung wa ai majaw Hkau hting hkau na sha galaw sha na Kanbau nga ai Mung masha ni grai yak hkak jam jau nga ma ai re hpe mung chye lu ai. Myen mungdan masa lam a majaw galaw lu galaw sha yak hkak mat ai hte maren putao ginra de Ja htu ai magam bungli grai dam lada wa ai re, Jau man masha ni gaw lu da ai lamu ga ni sha dut sha rai nna ya aten na yak hkak ai masa hpe hkyak hkyak hparan nga ra ai madang byin nga ai re hpe mung chye lu ai.
Myen hpyen dap Mungdan ahkaw ahkang jum tek uphkang wa ai hpang kaw nna myen mungdan shara shagu hta majan laja lana byin nga ai raitim Putao ginra kata hta gaw 2022 April shata ram kaw nna dai ginra hta Hpyen masa lam simsa nga ai rai nna Ja htu hpa ga galaw masha ni Putao girna mali hka mayan Ja htu ai magam bungli hpe grai dam lada ai hku galaw wa ai re hpe mung chye lu ai.
Ya na zawn Ja htu ai magam bungli dam lada wa ai hte maren Putao ginra kata madung malu masha gunrai ni rai nga ai N-gu, Jum, Sau hte Jak sau manu ni shawoi na hta htam lahkawng daram tsaw lung wa ai majaw ginra masha ni yak hkak ginchyum chyat nga ai re hte Putao ginra hta ja htu sha ai magam bungli hkan Jasam ginra na masha ni grau law nga ai re hte ginra masha ni gaw shara n lu ai masa byin nga ai re hpe mung chye lu ai.“ n dai hpang daw de shang wa ai Ja htu bungli madu ni yawng ngu na daram Jak kaba ni hte shang wa ai ni law ai, Ja htu bungli madu marai (10) kaw ginra madu ni marai (1) ram sha pyi n lawm ai, kaga ginra hkan na ni wa galaw sha ai grau law ai ” nga nna Ja htu bungli masha langai tsun dan ai re.
Ja htu sha ai gaw mali hka mayan hte Hti hka mayan hpring nga sai re hte Hti hka mayan gaw hpa pyi n ngam sai yawng atsai htu sha sai lam mung matut tsun dan ai re. “Mali Hka Mayan Backhoe Jak kaba ni hkrai hpring chyat taw sai, Hti Hka mayan mung laning mi laman yawng atsai htu sha kau sai” .
Putao ginra hta covid -19 ana zinli manghkang hpang de Myen hpyen dap kawn Mungdan ahkaw ahkang zing madu ai lam ni a majaw putao ginra kata nga hka shi Hka nu ni law malawng hten za, Hka lam gashai mat ai zawn re ai ni byin mat ai re hpe mung chye lu ai. Putao ginwang kata law malawng htu sha ma mat ai Hka ni gaw Hkrang Hka, Jahti Hka, Jingma Hka, Shaning Hka, Nhtan Hka,Mali Hka Sinpraw Hkran Hpung In Hka, Hpung Chyan Hka, Zanan Hka, Nbu Hka, Lai lum Hka, Mu Du Hka ni hkan ja htu sha ma wa sai re hpe mung chye lu ai.
Shiga -Mali Hku
Comentarios