Pajau Media Channel (Gunrai manu shiga)
Putao ginra hta dai ning na Mam dan shata laman Mam Pung mi hta ginra manu (12,000) du hkra tsaw lung wa ai re hte shawoi shaning na manu hta htam lahkawng tsaw wa ai re lam ginra masha ni tsun ai.
Shawoi shaning na Mam dan shata hta gaw ginra manu tsaw dik Mam Pung mi hta (5,000) rai nna dai ning laman kaw manu ladu lai tsaw lung wa ai a ntsa mung masha ni myit tsang nga ma ai lam chye lu ai. Putao ginra masha ni gaw Yi sun Hkau na galaw let madung Kanbau nga ai re hte (2021) Myen mung Uphkang masa galai shai wa ai hpang kaw nna Mungdan kata lani hte Jak sau hte Yi sun Hkau na galaw ai hta jai lang ai rung rai manu ni ladu lai tsaw wa ai majaw Hkau na galaw lu galaw sha masha ram ram yawm wa ai re hpe mung chye lu ai.
Dai ning laman kaw nna Putao ginra hta Ja htu ai magam bungli hpe dam lada ai hku galaw wa ai hte Putao ginra kata Ja maw ginra na masha ni gun rai ni hpe gashun gashe mari mahkawng da ai lam ni majaw gunrai manu ni ladu lai tsaw lung wa ai masa mung re lam chye lu ai.
Mam dan ladaw laman hta Mam,N-gu manu ni ladu lai manu tsaw wa ai masa hpe yu yang du wa na lanam ladaw hta N-gu lu sha manu ni gaw grai myit tsang ra ai madang byin nga ai re nga nna ginra masha ni tsun ai . Ya aten Putao ginra hta Ja Jet manu Lap mi hta Sen (15 kaw na 17) lapran manu nga ai re hte Ja Pe (15) gaw Sen (13-15) lapran manu nga ai, Jak Sau (92), (95) hpan gaw (1) liter kaw lap (3,730) daram nga ai rai nna shani shagu na lu sha manu ni mung shawoi shaning na hta htam lahkawng daram tsaw jat nga ai re lam Mali hku shiga jaw la ai.
Shiga - Malihku
Sumla - KNG
Comments