Pajau Media Channel
11th September, 2024
Putao ginra de gunrai htaw ai mawdaw kaji ni bai du sai raitim madung malu masha gunrai manu ni yawm ai lam n nga, lam pat nga ai aten na manu sha re nga nna ginra masha ni tsun ai re.
Putao ginra de shani shagu mawdaw du nga sai raitim gunrai manu ni tsaw nga dingyang re nga nna ginra masha ya na zawn tsun ai.
“ Mawdaw kaji ni shani shana du nga sai, raitim gunrai manu wa lam pat ai aten na hte hpa n shai, jak rai, disel manu chyawm kaji mi hkrat ai, ngam ai ni gaw nan nan sha re, jak sau chyawm 1 liter kaw mun mali jan kaw nna mun mi hkying manga de hkrat yawm wa ai, disel mung pepar langai kaw sen manga shi jan, N-gu, Jum, Sau, Shakau manu ni gaw n hkrat ai, yawm dik n-gu buk mi sen lahkawng jan, U di hkum masum kaw hkying manga n yawm ai”
Myitkyina Putao hkrun lam htenza mat ai majaw pat da ai shata masum daram na ai hpang September praw kaw nna mawdaw kaji ni bai hkawm sai re, Mawdaw kaba ni gaw n mai hkawm shi ai re hpe mung chye lu ai. Mawdaw ni hkawm nga ai raitim gunrai manu n hkrat ai gaw hkrun lam dingyang hkrun lam manu shawoi na hta grau jaw ra ai, hkrun lam yak hkak sha n-ga Myitkyina kaw mung gunrai manu ni rawt nga ai majaw re lam mung chye lu ai.
Ya aten Putao de mawdaw kaba bai hkawm lu na matu hkrun lam mahkrai ni gram shajang ai lam n lu galaw shi ai majaw malu masha ni hpe n bungli hku htaw shalai ai majaw mung gunrai manu n hkrat hkraw ai re nga nna mung tsun nga ma ai re.
Shiga -Mali hku
Comments