Pajau Media Channel
11th July, 2024
Myitkyina Putao hkrun lam gyi ru hten za mat ai majaw lam lapran chyat taw ai gunrai htaw mawdaw n kau July 9 ya kaw nna Putao de du shang wa sai raitim gunrai manu ni naw tsaw nga lam ginra masha ni tsun ai.
Ya aten du shang wa ai gunrai htaw mawdaw ni gaw Putao hte sumpra bum lapran bat lahkawng daram na hkra chyat nga ai ni re. Mawdaw n kau du shang wa sai raitim gunrai manu ni yawm wa ai lam n nga ai majaw aten galu wa yang grau yak hkak wa na hpe ginra masha ni myit tsang ai lam ya na zawn tsun ai.
“ mani shawng shani kaw na Gunrai htaw mawdaw (80) daram gaw du shang wa ai, raitim gunrai manu gaw n hkrat ai, grau pyi shatsaw dut sha nga ai re, hpang shata hkan nga yang Mung masa majaw hkrun lam grau pat mat na zawn nga shiga ni mung na taw nga ai grau yak hkak wa na masa re” lam tsun ai.
Ya aten ptuao ginra kata N-gu Bye Mi kaw (10,000-12,000), Jak sau 1 liter kaw (40,000), Sha Sau Joi mi kaw (40,000), hte kaga gaw gap arung arai ni mung naw hpu nga dingyang re, n dai manu ni gaw gasat gala a majaw lam pat mat nna tsaw lung mat wa ai gunrai manu hte nau n shai ai masa naw re lam ginra ni kaw na chye lu ai.
Ya aten hkrun lam masa gaw Sumpra Bum hte Tang Hpre lapran kaw naw chyat nga ai mawdaw ni nga ai re, htenza mat ai hkrun lam hpe bai gram sharai na matu lanam ladaw htum ai hpang she mai galaw na masa nga ai lam ginra masha ni tsun maram da ai re.
Gasat gala majan a majaw Putao ginra hkawm sa hkrun lam shata masum pat da ai hpang Putao ginra gunrai manu tsaw dik madang du mat sai re, June 19 ya kaw nna myitkyina putao hkawm sa hkrun lam hpe gan hpaw ya ai raitim lanam ladaw marang htu sawng nna hkrun lam hten za ai majaw hkawm sa n mai mat ai re hpe mung chye lu ai.
Shiga – Mali Hku
Comments