Pajau Media
9,Dec ,2024
Putao ginra kata PDF hpung ni shamu shamawt nga ai masa hpe gasat shamyit na ngu ai gabaw npu hta Puta-o, Machang Baw ginra kata hkan na asak 30 lahta na la Wa ngan ni, mare kahtawng langai na yawm dik marai 3 gaw hpyen hpaji wunkat lung nan Lung ra ai ngu ai masing hte Numdaw 2 lang ngu na hpyen hpaji sharin wunkat hpang hkyen nga ai lam ginra masha ni kaw na chye lu ai.
Masat yan (1) ngu na wunkat hpe November shata laman Bat lahkawng daram hte shangut la sai lam hte wunkat laman sharin hkaja la ai lam hte wunkat lung ai masa lam ni hpe wunkat la ngut sai Mung langai tsun dan ai re.
“Wunkat gaw Hk.L.Y (46) dap kaw na sharin woi ai re, hpyen wunkat sha gaw re, raitim Sinat gaw njaw lang ai . Anhte hpe gaw mare kahtawng hku na mying jahpan hte sa ra ai ,wunkat kaw na lagu hprawng ai ni mung grai law ai ,shanhte tsun yang gaw shawng lam de sa na matu nre ai da tinang na mare makawp maga na matu, ra yang ra ai hku pawng galaw na matu ngu sha tsun ai .Ya prat gaw lagut damya rai law wa ai majaw dai ni kaw na makawp maga na matu re” ngu tsun ai.
Masat Yan (1) sharin wunkat hta masha marai (68) shang lawm ai lam mung chye lu ai. wunkat hpe Bat hkawng sharin la ngut ai hpang tinang na shara de bai wa shangun ai rai nna tinang ginra kata PDF hpung ni shamu shamawt ai lam ni hpe aten dep shiga jaw la ra ai lam mung chye lu ai.
Wunkat ngut ai ni hpe hpyen bu hpun palawng ni garan jaw ai lam nga ai hte Masat Yan lahkawng ngu na wunkat hpe December shata laman hpaw hpang sa wa na re lam mung chye lu ai. Dai masing kata ginra kata na asak ram ai ramma ni hpe bai gahtap shaga ai lam ni galaw wa na hpe mung myit tsang nga ai lam Mali hku shiga jaw da ai.
Shiga-Mali Hku
Comments