Pajau Media Channel
1st May, 2024
Mungdan pru hkawm ahkang Passport laika buk galaw ai lam hpe May praw (1) kaw nna online booking ladat hte shawk shawn mai sai lam Myen Mungdan passport galaw ya ai rung ni kawn April praw 26 ya shani kaw nna ndau da ai lam chye lu ai.
Passport galaw na matu shawk shawn ai hta Jinghpaw Mung Myitkyina hte kaga mungdaw ginra ni hpe May 2 kaw nna tara shang Online Appontment System hte galaw ya na re lam hte Passport laika shawk shawn mayu ai ni May langai ya shani galaw hpang mai sai lam chye lu ai.
Online booking la ai aten hta aten masat da ai lam n nga ai sha aloi ali mai shawk shawn ai lam, hkrat ang ai manu hpe masat da ai masa hku nna jaw ra na re lam chye lu ai.Myitkyina ginra na passport agent langai tsun ai hta Myitkyina ginra kata hta passport hpe May 2 ya kaw nna shawk shawn mai sai hte laika buk n nan galaw na ni gaw 35,000 kyats, Laika buk aten bai jat la mayu ai ni mung 35,000 kyats hte laika buk mat mat na n nan bai galaw la mayu ai ni gaw 91,000 kyat du hkra jaw ra ai lam chye lu ai.
Myen hpyen dap gaw passport shawk shawn la na matu online booking ladat galaw nna QR code jahkrat ya ai hpang n htoi masat nna laika buk shaw la ai ladat hpe lai wa sai 2022 ning March 21 ya shani kaw nna galaw hpang nga sai rai nna December shata praw 5 daram kaw nna n dai ladat hpe gan pat kau ai re hpe mung chye lu ai.
Lai wa sai 2023 shaning February 24 kaw nna Yangon, Mandalay, Nay Pyi Taw, Bago hte Patheing ginra ni hta online hku nna passport shawk shawn ai lam hpe bai galaw hpang wa ai re, May 2 ya kaw nna myen mungdan ting hta online booking ladat hte mai galaw wa sai re lam mung chye lu ai.
Comments