Pangwa Hte Chipwi Kaw Na Gasau (Rare Earth) Htu Ai Bungli Dabang Ni Pat Wa Ai Majaw Bungli Mahkrun Ni Yak Wa Nga

Pajau Media

6th February 2026

Miwa mung jarit Pangwa hte Chipwi ginra hkan na ga sau (Rare Earth) htu ai bungli dabang ni law marawng jahkring da ai majaw bungli masha ni bungli taw wa ai hte nta de bai nhtang wa ai lam law nga ai lam dai ginra hta bungli galaw nga ai masha ni tsun ai re.

“Bungli dabang ni yawng pat da ai majaw nta wa na hkyen taw nga. Gara hku rai na gaw nchye ai. Masha ni tsun ai hpe na ai gaw gumhpraw arang grai law hkra bang da ai ni hte bungli dabang kaba ni sha htu nga ai da,” nga nna bungli galaw masha langai tsun ai re.

Pangwa hte Chipwi na ga sau (Rare Earth) htu ai bungli dabang malawng maga gaw lai wa sai February shata ka-ang kaw na pat da ai rai nna, gumhpraw arang law ai dabang kaba nkau mi sha naw matut htu nga ai lam chye lu ai.

Lai wa sai shaning kaw na Pangwa ginra hpe rawt malan hpung KIA ni kawn zing madu da ngut ai hpang gasau (Rare Earth) htu ai bungli dabang ni yawm wa nna matut galaw na dabang ni mung KIO hpe ahkun hkangse jaw nna galaw ra ai majaw pat da ai lam mai byin ai hpe ginra masha ni tsun ai.

Bungli galaw masha ni tsun ai hta ya ten gasau htu ai bungli dabang masha hta na sumtsan kaw na sa wa ai bungle galaw masha ni gaw bungli jahkring da ai majaw nta de bai nhtang wa ai ni law nga ai re hte, nkau mi gaw bungli lauban madu kaw na bungli shabrai hpyi na yak nga ai lam mừng tsun ai re.

“Ya gaw Miwa ni hpe gumhpaw hpyi na grai yak taw nga. Nkau mi nga yang lauban ni hte ga law ai du hkra hpyi la ra ai. Anhte ni ma hpyi da ai, ndai shata 15 ya shani jaw na gaw nga ai. La taw nga. Ya tên gaw Wai Maw, Myitkyina de yu ai ni sha law ai. Mawdaw ni ma lung ai gaw nmu ai, yu ai ni sha nga ai,” nga nna bungle galaw masha langai tsun ai.

Maga mi de mung mungdan jarit ni hpe lahkawng maga Asuya kawn tara shang pat da shangun ai majaw Kanpaiti masat(6) koi lam hku Miwa mung Guyung de le ai lam hku Miwa mung de shalai nga ai lam ginra masha ni tsun ai kawn chye lu ai.

Ga sau le ai Pangwa, Chipwi ginra ni gaw shawng de Zahkrung Ting Ying jum da ai ginra ni rai nna Miwa mung de gasau law jahtum sa taw ai ginra ni re lam mung chye lu ai.

Shiga - Htu Seng