Pangwa Ginra Masha Ni Galaw Lu Galaw Sha Bungli Taw Wa Ai Majaw Yak Hkak Wa Nga

Pajau Media

April 17, 2025

Jinghpaw mung Pangwa muklum hta sut hpaga galaw lu galaw sha bungli mahkrun ni grai taw wa ai majaw ginra nga mung masha ni yak hkak wa ai re lam ginra masha ni kaw na chye lu ai.

“Lai wa sai shaning hta gaw nhprang Ga Sau htu shaw bungli hte dingyang galaw nga ai re. Da ginsup dabang ni mung nga ai majaw masha grai law ai, gat dut ai lam ni mung grai kaja ai. Ya nga yang Da ginsup dabang ni mung pat mat sai, Ga Sau Htu shara lahkawng daram sha nga sai, masha n nga sai, galaw sha n mai sai. Bungli n lu yang grai yak hkak wa ai maga de rai sai,” nga nna Pangwa ginra masha langai tsun ai re.

Lai wa sai ten Ga Sau htu ai lam, Da ginsup dabang ni a majaw ginra nga mung masha ni bungli shang galaw mai nna sut hpaga lam ni galaw mai ai raitim ya aten uphkang masa galai shai wa ai hpang jak rung ni law malawng pat mat ai majaw grau yak wa ai masa re lam matut tsun ai re.

“Pangwa kaw na ya gaw jarit Gate ni mung pat da ai. Nam law nam lap ni mung manu grai rawt ai, manu hpu hpu hte mari sha ra ai, hkai lu hkai sha na matu mung du hkra ladaw a majaw nam hpun n kaja ai, hpa hkai sha mung n mai ai,” nga nna matut tsun ai re.

Maga mi de Miwa jarit lam ni mung ya aten du hkra n hpaw ai majaw gunrai manu ni mung grai rawt nga ai sha n-ga hkai lu hkai sha mung n mai majaw grau yak wa ai masa hte hkrum katut nga ma ai re.

Ya aten Chihpwi, Kanpaiti hte Pangwa ginra nga ai mung masha ni gaw KIO asuya uphkang nga ai kata nga nga ai re hte ginra rawt jat lam ni hpe mung KIO asuya kawn galaw hpang nga sai re hpe mung chye lu ai.

Shiga- Hpring