Pajau Media
28 February 2025
Jinghpaw mungdaw shanglawt hpyen dap KIA/KIO asuya up hkang ginra Pang Wa muklum hte Hpare ginra maga galaw taw ai ga sau (Rare Earth) hpe Kanpaiti masat 6 kaw na Miwa mung Guyung ginra de pru ai koi lam hku na Miwa mung de shalai taw ai hpe ginra masha ni tsun ai kawn chye lu ai.
“Ya galaw taw ai rare earth ni hpe dai Kanpaiti koi lam re ai masat 6 kaw na shalai taw nga ma ai, dai lam gaw Miwa mung Guyung kaw pru ai. Ya pru taw mawdaw ni yawng dai lam hku na sha shalai taw nga ai,” nga nna Pang Wa ginra masha langai mi tsun ai.
Lahkawng maga na jarit kaw na tara shang nshalai hkun ai majaw Kanpaiti masat 6 koi lam kaw na Miwa mung Guyung de pru ai koi lam hku shalai taw nga ai lam hpe chye lu ai.
Ya aten ga sau galaw ai masha ni law malawng hkring taw ai rai nna bungli bai galaw hpang na matu KIO/KIA asuya hta hkang se jaw ra ai hte hkang se njaw na bungli galaw yang ahkyak la ai lam hpe ginra masha ni tsun ai kawn chye lu ai.
“Ya pat hkrum da ai ni gaw shanhte KIO asuya de hkang se jaw shangun yang Zahkun Ting Ying hpe jaw da sai re da, ya nlu jaw ai nga nna njaw na nga taw ai majaw pat da ya ai. Hkangse jaw da sai ni gaw bungli hpang taw nga sai,” nga nna lahta na masha bai matut tsun ai.
Pang Wa jarit hta gunrai ni htaw lai na KIA hte Miwa asuya lahkawng maga de shawk shawn laika mara na hkangse jaw ra ai majaw hkangse njaw ai rare earth bungli ni gaw koi lam hku na htaw lai taw ai lam hpe ginra masha ni tsun ai.
Dai hta n-ga Pang Wa , Chyang Yin Hku hte Hpare ginra kaw nga ai rare earth bungli madu ni gaw Miwa ni rai nna lai wa sai ten na hkangse hpe gaw Zahkung Ting Ying hpe jaw sai re majaw KIO/KIA hpang de bai nlu jaw ai majaw pat da ya ai re.
Dai rai nna hkangse bai jaw ai bungli nkau mi bai galaw hpang taw sai re hpe tsun ai.
Shiga - Hpring
留言