Pajau Media
October 9th, 2024
Chihpwi ginra na Chang Maw Hkung ginra masha 300 daram gaw NDAK Laksan Uphkang Ginra kata de du shang wa ai KIA/KPDF pawng hpawm hpung ni hpe n ra sharawng ai lam October 8 ya shani ninghkap n-gun madun ai lam nga ai re hpe mung chye lu ai.
Ninghkap n-gun madun ai hta “Amyu shamyit dingsa gasat ai lam hpe makawp maga ga, gumshem ai KIA/PDF ni hpe nra sharawng ai, Law hpa myit a majaw masha asak n sat ga, Ma ni hpe hpaji sharin ahkaw ahkang jaw myit, Mung dinghku majan n ra sharawng ai, Simsa lam hpe jahten sharun nga ai KIA, PDF ni hpe n ra sharawng ai,” nga nna laika lawm ai Pyen Dau ni hpai let lam hkawm n-gun madun ai re hpe mung chye lu ai. N-gun madun ai kaw Mare kanu kawa ni, Jawng ma ni law malawng shang lawm ai re lam chye lu ai.
NDAK Lak San Uphkang ginra Chihpwi Muklum hte Saw Law Muklum ni hpe KIA pawng hpawm hpyen hpung ni kawn zing madu la lu sai re. Dai sha n-ga Pang Wa sa lam ntsa nga ai Deng 11 Myen hpyen dap shara hpe mung October 3 ya shani KIA kawn zing madu la lu sai lam, Pang Wa ginra de matut manoi htim gasat nga dingyang re lam chye lu ai.
Comentarios