Pang Wa Ginra Hta Htinggaw Jahpan Laika Ni Hpe KIO Asuya Kawn Lit La Galaw Ya Nga

Pajau Media

10. January 2024

KIA pawng hpawm hpung ni zing madu da sai Pang Wa ginra hpe KIO uphkang masa galaw hpang nga sai hta ginra nga masha ni hpe htinggaw jahpan laika ni hpe KIO asuya kawn lit la galaw ya nga ai sha n-ga mungdan laidi hkawm sa ahkang laika buk ni kaw na hkawt galaw ya na matu hkyen lajang nga sai lam Pang Wa ginra masha ni tsun ai kaw na chye lu ai.

Pang Wa ginra kaw KIO asuya rung hkrang hte masing hkran galaw nga ai hta Mung masha ni a shimlum lam, hpaji lam, hkamja lam ni hpe KIO uphkang masa hte hkrak grau masan sa wa hkra hkrang shapraw galaw nga ai lam Pang Wa ginra masha langai tsun ai re.

“KIA gaw tara shaja wa sai. Kam ai hku nga ai hpe nra sharawng sharawng ai Pang Wa kaw ya nga yang Cycle gup chyawp n chyawp yang rim ahkyak la ai lam ni galaw ai. Htinggaw jahpan laika pa ni hpe mung KIO asuya hkrang hte hkrak galaw ya sai. Ginra kata Manam jahpan tang yang pyi sumla hte hkrak rai nna galaw ra sai. Uphkang masa Policy ni yawng galai sai,” nga nna tsun ai re.

Pang Wa ginra hkawm sa hkrun lam mung lam htenza ai hte yak hkak ai masa a majaw sha n-ga ya aten na mung masa a majaw Myitkyina kaw na Pang Wa du hkra hkawm sa shabrai marai langai hta Sen 4 kawn sen 5 daram ma ra ai re hpe mung chye lu ai. KIO asuya kawn lit la ai hte Pang Wa-Chihpwi hkawm sa hkrun lam ni hpe mung gram lajang na matu hkyen lajang nga sai re lam mung ginra masha matut tsun ai re.

“Ya kade nna yang Chihpwi-Pang Wa lapran hkrun lam hpe Katayar lam (Asphalt lam) gram lajang na matu hkyen nga sai. Miwa lam galaw masha ni hpe ap nna galaw shangun na matu hkyen taw sai. Mung masha a matu akyu ara rai nga.”

Pang Wa ginra hpe shaning (30) ning hkawt NDAK Zahkung Ting Ying kawn Masat (1) Kachin Lak San Uphkang ginra hku nna nga lai wa sai hpe KIA pawng hpawm hpyen hpung ni kawn 2024 October 18 ya shani htim gasat zing madu la lu sai re hpe mung chye lu ai.

KIA zing madu ai kade nna ai hpang November 28 ya hta Pang Wa Masat (1) Kachin Lak San Uphkang Ginra ngu mying hpe KIO asuya kawn tara shang dawm kau ai lam n dau laika shapraw ai hpang kaw nna KIO uphkang sai ru hte uphkang wa sai re hpe mung chye lu ai.

Shiga – Hpring