Pajau Media Channel
10th August, 2024
Myen hpyen dap gaw Myen mungdan kata gasat gala majan laja ai Mungdaw ginra ni hta Phone, Internet line ni hpe aten n masat dawm kau ya ai lam ni galaw nga ai re. Jinghpaw mung hta mung July 21 ya kaw nna online dawm kau ai gaw ya aten du hkra re.
Dai hpang Online hku nna sut hpaga galaw ai ni, gat dut magam bungli galaw ai masha ni, laika sharin sha ai ni, gumhpraw shalai ya ai zawn re ai ni yawng hkring mat ai re.
Jinghpaw mung kata matut mahkai Phone, Internet ni yawng dawm kau ai bat masum daram na wa sai rai nna Online hpe madung dat nna bungli galaw nga ai ni yawng bungli hkring ra mat ai re hpe chye lu ai.
Online dawm kau ai hpang yak hkak ai masa hpe Online hku nna hpaji sharin ai bungli galaw nga ai Sara Num langai tsun ai hta, “Grau na gaw maigan pru na ni hpe madung tawn laika sharin ya ai rai nga, ya online n lu mat ai hpang gaw matut mahkai lam nan nlu mat sai. Moi na zawn n dau laika ni hkan gam na matu mung galoi she line lu na mung n chye, bungli hkring ra mat sai,” nga nna tsun ai.
August praw kaw nna MPT Phone line langai sha mai matut mahkai na matu hpaw da nna laga phone line yawng pat kau ai hpang August praw 6 ya kawn ATOM phone line bai hpaw ya sai raitim shara shagu kaw mai shaga ai madang gaw nrai shi ai re. Ya aten MPT phone line hpe madung jai lang nga ai re majaw MPT phone gumhpraw mari bang la na matu pyi grai yak wa ai madang byin nga sai re hpe mung chye lu ai.
Jinghpaw mung kata matut mahkai lam pat kau ya ai gaw mung masa a majaw Myen hpyen dap asuya kawn pat kau ai re hte galoi aten du hkra pat na ngu gaw nlu tsun ai hte mung masha ni gaw matut mahkai lam hpe lawan bai hpaw ya na hpe ra sharawng nga ma ai re hpe mung chye lu ai
Comments