Nnang Nawn A Majaw Asak Si Sum Mat Ai Masha 3,000 Jan Wa Sai Lam Myen Hpyen Dap N Dau

Pajau Media

3 April, 2025

Myen mungdan kata March 28 ya hta byin ai nnang nawn a majaw April 2 ya du hra asak si sum mat ai masha 3,000 jan du nga sai lam Myen hpyen dap madu ai shiga dap kaw na March 3 ya shani n dau da ai re hpe chye lu ai.

Myen hpyen dap madu ai Media kawn n dau da ai hta April 2 ya shana daw hkying 6 daram du hkra hta la lu ai jahpan hku nga yang asak si sum ai masha 3,003 nga sai lam, hkala hkrum ai masha gaw 4,515 du hkra rai sai lam tang madun da ai re. Dai hta n-ga naw mat nga ai masha gaw marai 350 jan re lam mung tsun da ai re hpe chye lu ai.

Nnang Nawn kaba a majaw Mung shawa dum nta 21,783 hte laika sharin jawng 1,041 hten za mat ai sha n-ga asuya magam gun nga shara dum nta, asuya rung nta ni, nawku makam masham jawng ni law law mung hten za lawm mat ai lam tsun da ai re.

Ya aten mungkan mungdan shara shagu kaw nna mung karum ningtum hkye mawoi bungli ni matut manoi garum nga ai hte Miwa, Russia, India, Thai, Singapore, Malaysia, Bangladesh, Vietnam, UAE, Lao, Belarus, Indonesia, Bhutan, Philippine, Japan hte Hong Kong, mungdan yawng pawng 15 ram kawn hkye mawoi karum masha 1,915 hte hkye mawoi bungli matut manoi shang nga ai re lam mung matut chye lu ai.

Shiga - Zaw