Pajau Media
24.10.2024
Myen hpyen dap gaw Nmawk hte Manmaw ginra de laknak kaba matut manoi gap bun nga dingyang re lam chye lu ai.
October 24 ya jahpawt daw hkying 9:45 AM kaw nna hkying 1:00 PM lapran Deng 3, 4 makau grup yin de myen hpyen dap kawn gap dat ai laknak kaba si lahkawng lang wa hkrat kapaw ai lam chye ju ai.
Ya aten Nmawk ginra mayan de hpyen masa grai shaja hkat nga ai rai nna October 23 ya saha ni hta mung KIA pawng hpawm hpung ni shara la nga ai Nmawk deng 7 Awng Mye mare makau de nbungli bawm 5 lang ram wa jahkrat bun ai lam, Drone bawm mung 3 lang gap bun ai lam hte 60MM, 81MM, 120MM, 122MM ngu maram lu ai laknak kaba ni hte mung gap bun ai lam chye lu ai.
Dai shani hta sha Myen hpyen dap maga na Tank mawdaw ni lawm rai nna hpyen n gun jat htu shadut htim gasat wa ai hpe KIA pawng hpawm hpung ni hkap shingla gasat ai lam nga ai re.
Lai wa sai August 19 ya shani Nmawk ginra Hk.M.Y 437 dap hpe KIA pawng hpawm hpyen hpung ni htim gasat zing madu ai hpang kaw nna Nmawk ginra de Myen hpyen ni hpyen n gun laja lana htu shadut wa ai majaw ya aten hpyen masa grai shaja hkat nga ai re lam mung chye lu ai.
Comments