Pajau Media Channel
5th September, 2024
Myen hpyen dap gaw ga lam, n bung lam hku nna lak nak kaba hte laja lana gap gasat nga dingyang re majaw Manmaw ginwang Nmawk ginra hta KIA pawng hpawm hpung ni hte Myen hpyen dap lapran gasat gala majan laja nga dingyang re hpe mung chye lu ai.
Lai wa sai August 24 ya kawn hpang nna Myen hpyen dap kawn tat sum kau sai Hk.M.Y (437) Dap hpe bai lu la hkra Nmawk ginra de hpyen n-gun jat htu shadut htim gasat nga ai gaw dai ni du hkra re. Nmawk ginra kata gasat gala shani shagu byin ai rai nna ga lam, n bungli hku nna laja lana htu shadut htim gasat nga dingyang re.
August 24, 25 ya shani Manje de htu shadut shamu shamawt wa ai Myen hpyen dap hpe Kawng Ja Yang mare makau kaw KIA pawng hpawm hpung ni kawn hkap shingla gasat ai lam, August 27 ya shani hta mung Nmawk de hpyen n-gun jat shamu shamawt lung wa ai Myen hpyen dap hte KIA pawng hpawm hpung ni Nmawk Deng 6, 7 lapran kaw gasat gala byin ai lam nga ai re hpe chye lu ai.
Nmawk ginra hta gasat gala majan laja nga dingyang re hte Nmawk kaw daju ai Hk.M.Y (437) Dap hpe September praw hta Myen hpyen dap kawn bai lu la sai lam shiga masu ni mawng nga ai lam, ta tut hta KIA pawnghpawm hpung ni kawn makawp ninghkap galaw nga dingyang re hpe mung chye lu ai.
Nmawk kaw daju ai Hk.M.Y 437 dap hpe KIA pawng hpawm hpung ni kawn shata mi daram na hkra htim gasat ai hpang August 19 ya shani padang dip zing madu la lu sai re. Myen hpyen dap gaw tat sum kau sai Dap shara ni hpe lu la hkra hpyen n- gun jat htim gasat nga dingyang re hpe mung chye lu ai.
Comments