Pajau Media
24.9.2024
Myen hpyen dap gaw Jinghpaw Mung ginra de n-gun kaba hte htu shadut htim gasat nga ai re hte ya aten Nmawk Deng (7) ginra hta mung KIA Dap Ba (3) pawng hpawm hpyen hpung ni hte Myen hpyen dap lapran gasat gala majan laja nga dingyang re.
September (23) ya shani hta mung Nmawk ginra de hpyen n-gun jat shamu shamawt wa ai Myen hpyen hpung ni hpe KIA pawng hpawm hpung ni kawn htim gasat ai re. Myen hpyen dap gaw lagaw lam htu shadut ai sha n-ga Manmaw makau Deng 7 mare mayan de nbungli bawm 7 lang n-ga wa jahkrat bun ai lam nga ai zawn Drone, Tank mawdaw ni hte laja lana htim gasat nga ai lam chye lu ai.
Gasat gala majan gaw dai ni du hkra laja taw nga ai rai nna Myen hpyen dap gaw nbungli ni hte laja lana htim gasat nga ai lam chye lu ai. Ginra masha ni tsun ai hta Myen hpyen dap kawn nbungli 3 hte htim gasat ai lam mung tsun ai re. Lai wa sai September 17 ya shani Shwe Gu kaw na Manmaw de lung wa ai Myen hpyen dap a malu masha, hpyen arung rai htaw Sanghpaw hpe KIA pawng hpawm hpung ni htim gasat ai majaw Sanghpaw langai sha Manmaw de du wa lu ai lam chye lu ai.
Nmawk kaw daju ai HK.M.Y (437) Dap hpe KIA kawn htim gasat zing madu la ngut ai hpang Manmaw kaw daju ai Myen hpyen dap gaw Nmawk hte Manmaw lapran de hpyen n-gun jat shamu shamawt ai lam shani shagu galaw nga ai majaw gasat gala majan laja nga ai re lam chye lu ai. Tat sum kau ai Myen hpyen dap ni gaw Manmaw ginra kata na ahkyak ai Myen hpyen dap shara re majaw Myen hpyen dap kawn bai lu la hkra shakut nga ai re lam chye lu ai.
Comments