Pajau Media
4th November,2024.
Manmaw-Nmawk ginra deng (7) Awng Myay mare makau grup yin maga de lai wa sai October shata laman gum shem Myen hpyen dap kawn hpyen n-gun kaba hte laja lana htu shadut htim gasat ai lam galaw lai wa sai raitim, ndai laman November praw 4 ya shani du hkra hpyen n-gun htu htim gasat ai lam nnga ai sha gasat poi zim nga ai lam ginra shi sawk ni kawn chye lu ai.
Gum shem Myen hpyen dap gaw ndai laman deng (7) Awng Myay mare maga de Drone bawm hte sa jahkrat gasat ai lam nga ai raitim, hpyen n-gun kaba lagaw lam htu shadut htim gasat ai lam gaw nnga ai lam chye lu ai.
Lai wa sai October shata laman hta sha gum shem Myen hpyen dap gaw Jet nbungli hte bawm jahkrat gasat ai lam, Drone bawm jahkrat gasat ai lam, Hpri gang maw daw (4) hte lagaw lam hpyen n gun htu shadut gasat ai lam ni hpe laja lana gasat lai wa sai re.
Wunpawng Mungdan Shanglawt Hpyen Dap (KIA) pawng hpawm hpyen hpung ni gasat zing da ngut sai Nmawk muklum hpe gum shem Myen hpyen dap gaw bai lu la hkra ladat amyu myu jai lang nna, shani shagu htim gasat nga ai re hpe chye lu ai.
Nmawk ginra na hpang jahtum ngam ai gum shem Myen hpyen dap Hk.M.Y – 437 dap hpe KIA pawng hpawm hpyen hpung ni gaw August shata nhtoi 19 ya shani hta zep zi gasat zing madu da lu sai rai nna, Nmawk muklum ting hpe zing madu da lu ai shata lahkawng daram na wa sai re hpe mung matut chye lu ai.
Comentários