Njang Yang Ginwang Kata Myen Asuya Hpaji Jawng Ni Hpe KIO Hpaji Dap Uphkang Ai Kata Hpaw Sharin Nga Sai Lam

Pajau Media Channel

Njang Yang muklum gaw shaning na na Myen asuya uphkang masa n pu nga ai raitim lai wa sai 2023 November shata laman Njang Yang Ginwang kata dap jung nga ai Myen asuya hpyen dap hpung ni htingnut mat ai hpang KIO uphkang masa hte pat tawn da ai hpaji jawng ni hpe mung bai hpaw sharin hpang nga sai re lam chye lu ai.

Njang Yang muklum kaw dap jung nga ai Myen asuya hpyen dap ni htingnut mat wa ai hpang hpaji jawng magam gun jawng up hte jawng magam gun ni mung yawng wa mat ai re majaw Njang Yang ginra kata jawng ma ni hpaji matut sharin hkam la na matu grai yak hkak mat ai re, raitim ya aten na ginra masa hte seng nna ginra masha ni hpe san sagawn ai hta KIO hpaji Dap masing masa kata hpaji jawng hpe hpaw sharin nga sai raitim sharin sara/num n law ai mayak ni naw nga ai re hpe mung chye lu ai.

“Jawng sr/srn n law ai, ya aten shinggan uhpung uhpawng n kau hte makam masham nawku hpung ni hpang de garum hpyi da ai lam ni gaw nga ai, shawoi na zawn hpaji jawng hpe dingyang lu galaw hkra shakut nga ai ” nga nna Njang Yang ginra masha langai tsun dan ai.

Njang Yang ginwang kata Nlawk Yang mare lawu tsang jawng hte Njang Yang lahta tsang jawng lahkawng nga ai re hte hpaji sharin hkam la nga ai jawng ma marai (400) grup yin nga ai re hpe mung chye lu ai. Njang Yang ginwang gaw KIA Dap Ba (1) Uphkang Gaiwang mung re hte ya aten hpaji jawng ni hpe ginjaw hpaji dap a masing masa kata woi galaw hpang nga sai lam chye lu ai.

Shiga - Hkungri

Sumla - KNG