Pajau Media
4 March 2025
Jinghpaw mungdaw Myitkyina muklum Dapkawng lam Njang Dung lahta Tsang jawng masat 6 shawng na maza sumpum kaw num langai a moi mang hpe makai da nna sa kabai da ai hpe ginra masha ni tsun ai kawn chye lu ai.
Dai moi mang hpe gaw karum kahtau hpung kaw na Myitkyina tsi rung de la wa nna jep yu ai shaloi abyen adup da ai ana hte lagaw lahkawng hpe gaw cycle gyit sumri hte gyit da ai re hte du kaw gaw nylon sumri hte gyit da nna myiman mung mang taw ai hpe kaum kahtau hpung kaw na masha langai mi tsun ai kawn chye lu ai.
“Myiman mung chyang mang taw nga, hkum kaw ma adup zingri da ai, ngut yang lagaw hte du hpe gaw sumri ni hte gyit da ai. Lagaw hpe gaw cycle gyit sumri hte gyit da ai, du kaw gaw nylon sumri hte gyit da ai,” nga nna karum gahtau hpung kaw na masha langai mi tsun ai re.
Dai moi mang hpe gaw ya du hkra kadai re nchye lu shi ai majaw ni htep ai jinghku ni hpe ma nlu shana shi ai nga nna ginra masha langai mi tsun ai.
Ya aten Myitkyina muklum hta lagut damya ni grai law wa ai re hte mya lu mya sha grau galaw wa ai a majaw masha mat ai ni mi na hta grau law wa nna sat hkrum ai ni mung grau law wa ai re.
Lai wa sai February 28 ya shana hta mung Myitkyina Satapru lawk hta num kasha langai mi nhtu hte kahtam sat hkrum ai mabyin byin lai wa sai re.
Shiga - Hpring
Comentarios