Pajau Media
1.11.2024
Lai wa sai September hpang jahtum bat kaw nna KIA pawng hpawm hpung ni htu shadut majan hpang wa ai hta ginra kata na hpang jahtum ngam ai BGF Dap 1001 dap hpe KIA pawng hpawm hpung ni kawn October 31 ya shana daw hta padang dip zing madu la lu sai lam KIO shiga magam dap Lithkam kawn ginra shiga dap ni de tsun shagrin da ai kaw na chye lu ai.
NDAK Ningbaw Zahkung Ting Ying woi awn ai ginra kata nga ai Jarit Sin hpyen dap yawng hpe zing madu la lu sai rai nna Padang dip zing madu la lu ai shra ni hkan ginra jasan ai magam bungli matut manoi shang nga ai lam chye lu ai.
NDAK laksan uphkang ginra ngu ai kata Jarit Sin Hpyen Dap masat 1001,1002,1003 ni lawm ai hta dap shara masum hte hpe KIA pawng hpawm hpyen hpung ni kawn shata mi laman padang dip zing madu la lu sai re hpe mung chye lu ai.
Jarit Sin hpyen Dap masat 1001 gaw Chihpwi sinpraw maga Hpyi Maw mare makau kaw dap jung ai lam, 1002 Dap gaw Pangwa Muklum Lu Pyi mare kaw dap jung ai rai nna 1003 Dap gaw Kanpaiti makau kaw dap jung ai dap shara ni re lam chye lu ai.
Ya aten NDAK uphkng ginra yawng gaw KIA pawng hpawm hpyen hpung ni zing madu da lu sai hte Pangwa, Chihpwi, Saw Law Muklum hkan gaw KIO uphkang masa hkrang shapraw galaw nga sai lam chye lu ai.
Ya aten Kanpaiti ginra kata Myen hpyen dap hpyen n-gun jat shamu shamawt ai lam dingyang galaw nga ai majaw shani shagu sinat n sen ni na nga ai lam, Kanpaiti muklum kata na Mung masha 700 grup yin mung Miwa jarit mayan koi yen nga ai hta aten ladaw na wa yang malu masha nga shara ni grai yak hkak wa na hpe mung myit tsang nga ma ai lam chye lu ai.
Comentarios