Pajau Media
28.11.2024
Kanpaiti muklum hpe KIA pawng hpawm hpyen hpung ni zing madu ai bat mi daram rai wa sai hte ya aten KIO uphkang nga sai raitim Mung masha ni gaw dum nta de n gwi wa shi ai lam ginra masha ni tsun ai kaw na chye lu ai.
Ya aten Kanpaiti muklum kata KIO uphkang sai ru hpang nga sai hte myi hprap wan ni lu nga sai re. Raitim Myen hpyen dap gaw KIA pawng hpawm hpung ni zing madu da sai shara ni hpe bai n lu zing madu la yang jahten kau na ngu ai masing hte aten n tam nbungli bawm wa jahkrat bun ai majaw ya aten Kanpaiti ginra na hpyen koi yen nga ai Mung masha ni dum nta de n gwi wa nga shi ai re lam chye lu ai.
Gasat gala majan byin ai lam n nga ai raitim Myen hpyen dap gaw lai wa sai November 26 ya shana daw hta Waimaw Washawng ginra de nbungli lahkawng hte bawm wa jahkrat ai lam nga ai re. dai shara kaw na Mung masha ni yawng gaw hpyen koi yen mat sai re majaw Mung masha hkra hkala ai lam gaw n nga ai re hpe mung chye lu ai.
N dai Laman Waimaw ginra de Myen hpyen dap kawn hpyen n-gun jat shamu shamawt nga dingyang re majaw gasat gala byin ai lam n nga ai raitim shana de shagu ngu na daram makau grup yin de lak nak kaba gap shadam ai lam ni galaw nga ai re lam mung chye lu ai.
Ya aten KIA pawng hpawm hpyen hpung ni kawn Jinghpaw mung ginra kata nga Miwa jarit yawng hpe zing madu uphkang nga sai re majaw majan hpyen man gaw Waimaw ginra de yawng nga ai re hte kade n na ai aten Waimaw ginra de mung majan laja wa na masa nga ai lam ginra masha ni tsun maram da ma ai re.
Comments