Pajau Media Channel
June 17, 2024
Majan byin ai lam nnga ai Manje ginra kata na Han Htet mare hta mani June shata shana hkying 10 grup yin aten, Myen hpyen gumshem dap a nbungli hte bawm jahkrat bun ai majaw dum nta nkau hkra hten za hkrum mat ai lam nga ai re.
Myen hpyen gum shem dap a nbungli bawm jahkrat bun ai hta Han Htet mare tsi jaw gawk shingdu na mung shawa dum nta nkau hkra hten za mat ai rai nna, dai mare hta majan byin ai lam nnga ai sha Mandalay, Tada Oo maga kawn rawt lung wa ai nbungli hte bawm jahkrat bun ai re. Raitim, mung masha hkra hkala nna asak si sum ai lam gaw nnga ai lam ginra masha ni tsun ai.
Lai wa sai June shata nhtoi 11 ya shani hta mung Manmaw hte Manje ginra kata na Kaba Ni (ကမ္ဘာနီ) mare hta lak nak kaba hkrat kapaw ai majaw dum nta law malawng hkra hten za nna ginra masha marai 9 daram hkra hkala ai lam nga lai wa sai re. Dai shani hta sha dum nta lahkawng lak nak wan hta hkru lawm mat wa sai hpe chye lu ai.
Han Htet mare gaw lai wa sai April shata praw 5 ya shani hta Wunpawng Mungdan Shanglawt Hpyen dap(KIA) pawng hpawm hpyen hpung ni kawn gasat padang dip zing da lu ai mare rai nhtawm dai shani hta mung nbungli bawm jahkrat bun ai majaw Hpung Gyi jawng makau na dum nta nkau hten za hkrum mat ai lam ginra masha ni kawn chye lu ai.
Comments