Pajau Media
10 March 2025
Sagaing mungdaw Tigyaing muklum kaw na Pawk Kung mare makau na Kwin Gyi lambraw hta Myeikhtila kaw na lung wa ai jet fighter bawm hte sa htim gasat ai majaw mung masha langai mi hkra hkala hkrum ai hpe ginra masha ni tsun ai kawn chye lu ai.
Ginra masha langai mi gaw “Myen hpyen dap kawn jet fighter hte bawm lahkawng sa jahkrat ai kaw asak 49 ning ram re ai slg langai a lagaw hkra hkala hkrum ai. Nta 5 ram hten mat ai. Nga uloi 3 si mat ai, jak sau seng langai ma wan hkru hten mat ai,” nga nna tsun ai.
Mabyin gaw lai wa sai March shata praw 8 shana maga hkying 5 aten hta byin lai wa nna Tigyaing mare makau hta myen hpyen hpung ni hte PDF hpung ni majan byin taw ai shaloi Kwin Gyi mare hta nbungli hte bawm wa jahkrat htim gasat ai re.
Dai majaw ginra masha ni gaw majan nbyin ai shara rai nga ai Kwin Gyi mare hta ya na zawn nbungli hte bawm ni wa jahkrat bun ai gaw mung masha ni hpang de dasang baw tawn nna galaw nga ai lam re nga nna tsun jahta maram nga ma ai re.
Shiga – Kachin Pyi Tar
Comments