Pajau Media Channel
3rd April, 2024
April (2) ya shana hkying 7:45 PM daram hta marang kaba ladu lai htu sawng ai hte nbung laru kaba ai majaw Danai ginra Lawt Mai Yang mare hta mung masha dum nta law law hten za hkrum mat ai lam chye lu ai.
Marang Kaba htu sawng nna sin hkrat ai hte nbung laru kaba sawng wa ai majaw dum nta hpri zut ni baw malawng mat ai sha n-ga nkau mung shawa dum nta ni gaw baw malawng mat ai hte kaga arung arai ni law law mung hten za hkrum mat ai lam nga ai re.
''Mana na nbung hta nta hte arung arai ni baw malawng mat na dai hpawt gaw lam kaw na she sa hpai, sa hta la ra ai. Anhte nta kaw hkrat ai sin gaw dai ram n kaba ai. Masha ni nta kaw hkrat ai sin chyawm grai kaba ai. Mana gaw grai hkrit kau sai” nga nna mung shawa langai ya na zawn tsun ai.
Lawt Mai Yang mare gaw lai wa sai 2021 shaning kaw nna hpyen yen mungshawa ni nga na matu gaw gap da ai mare re hte dum nta htinggaw 30 jan daram nga ai re. Ya na zawn marang htu sawng ai hte nbung laru kaba byin ai majaw dum nta law law hten za hkrum ai re sha n ga hten za hkrum ai dum nta ni hpe mai byin ai masa hku gram sharai nga ai re lam chye lu ai.
Shiga - Hugawng
Comments