Pajau Media
18.10.2024
Putao ginra kata Gunrai manu laja nga ai lam hpe shayawm kau lu na matu ginra kata na shinggyim nau na garum hpung hpaw let galaw wa ai hta ya aten N-gu hte kaga Gunrai malu masha ni hpe Putao ginra sha n-ga Nawng Mung, Hkawng Lang Hpu ginra du hkra htaw shabrai n la ai sha htaw shalai hpang nga sai lam chye lu ai.
Putao ginra kata na Uhpung ni (7) lawm ai Garum ningtum hpung ni hku nna n-gu jak sau hte malu masha ni hpe manu hkyem sa ai hku dut ya ai lam hpe September htum wa maga kaw nna dut shabra hpang nga sai re hte October kaw nna gaw Putao sha n-ga Nawng Mung, Hkawng Lang Hpu du hkra htaw shabrai n la ai sha dut shabra hpang nga sai majaw gunrai manu ni grai hkyem sa ai hte mai lu sai re nga nna Nawng Mung ginra masha tsun ai.
“ Nawng Mung Hkawng Lang Hpu ginra masha ni gaw Putao ginra kaw na she gunrai ni hpe bai htaw shalai la la re ai rai nga, Ya Putao ginra kata gunrai taw nna manu hpu yang manu hpu ai hku htaw la , tinang ginra de du yang gaw manu grai sharawt nna bai dut sha ra mat re grai yak mat ai re, Ya gaw Ginra garum ningtum hpung ni manu hkyem sa ai hku dut shabra ya ai majaw grai tsamai mat sai” nga nna Nawng Mung ginra masha tsun dan ai.
Lai wa sai June shata daram marang ladu lai htu sawng ai majaw Hkawng lang hpu hkawm sa hkrun lam ram ram hten za mat ai majaw Mawdaw n mai hkawm sa shara hkan Cycle hte htaw shalai la nna Hkawng Lang Hpu ginra du hkra shadu ya ai re, Htaw manu hta lai nna amyat shakap ai lam n nga ai sha N-gu Buk mi kaw 150,000 kaw na 170,000 lapran htaw shalai ya nga ai re lam mung chye lu ai.
Gasat gala majan hte hkrun lam hten za ai mayak a majaw Putao, Hkawng Lang Hpu ginra ni hta N-gu manu buk mi kaw sen Mali du hkra tsaw mat ai sha n-ga Jak Sau hte kaga gunrai ni mung manu tsaw mat ai re. Dai kaw nna putao ginra kata gunrai manu hkrat yawm ai lam n nga ai mat ai masa hpe shayawm kau lu na matu yaw shada let Putao ginra kata Nawku makam masham shinggyim nau na garum ai Hpung (7) shang lawm nna Myitkyina kaw na madung gunrai lu sha ni hpe htaw shalai la n htawm Putao ginra kata Manu hkyem sa ai hku dut shabra ya ai bungli hpe galaw hpang wa ai re.
N dai magam bungli a majaw Putao ginra gat lawk kata na gunrai manu ni hpe ram ram gawn hkang lu mat ai re hte n dai magam bungli hpe 2024 shaning htum du hkra matut galaw sa wa na masing nga ai lam shingggyim nau na garum hpung ni tsun da ai kaw na chye lu ai.
Comments