Pajau Media Channel
June 27, 2024
Waingmaw, Nawng Hkying mare hta jawng hpaw sai raitim jawng gawk hte sharin sara nlaw ai majaw aten garan sharin nga ai lam chye lu ai.
Hpyen yen jawng ma ni hte hpawn Nawng Hkying mare na jawng ma yawng pawng hkying mi jan nga ai rai nna, jawng gawk nlaw ai hte sharin sara nlaw ai majaw grai yak hkak nga ai lam mung chye lu ai.
Jawng hpe lai wa sai June shata praw 1 ya shani kawn hpaw hpang sai raitim jawng nlu lung nhtawm, jan nga ai jawng ma yawng tsa lam naw nga ai re.
Jawng gawk nlaw ai sha n-ga, sharin sara nlaw ai majaw yak hkak nga ai lam hpe ginra masha langai ya na zawn tsun ai.
“Ya gaw jawng ma gaw law, laika sharin ya na sara gaw nlaw rai nga ai. Jawng gawk nlaw ai hte sharin sara nlaw ai hte re majaw ya hkyak hkyak gaw aten garan na sharin taw nga ma ai. Jahpawt daw hte shana daw garan na sharin nga ai.”
Ya aten Nawng Hkying mare hpaji jawng hta sharin nga ai jawng ma ni gaw jawng gawk nlaw ai majaw jahpawt daw hte shana daw masha garan nna pang hte pang sharin nga ai raitim, jawng nlu lung shi ai jawng ma ni gaw Waingmaw masat (1) lahta tsang jawng na jawng ma ni re hte jawng htawt lek mak nlu ai majaw Nawng Hkying jawng hta nhkap la nna, jawng nlu lung ai ni re hpe matut chye lu ai.
Jawng gawk nlaw ai hte jawng htawt lek mak nlu ai majaw Nawng Hkying mare hta nhkap la nna jawng nlu lung nga ai hpyen yen jawng ma yawng marai 400 daram nga ai lam matut chye lu ai.
Comentarios