Pajau Media Channel
15th August, 2024
Jinghpaw mung kata lanam ladaw hta hkali, waw ana law malawng nga ai hta n dai laman Nawng Hkying hpyen koi yen dabang hta mung hkali, waw machyi ai masha law nga ai lam hpyen koi yen mung masha ni tsun ai kaw na chye lu ai.
Dum nta langai kaw machyi masha langai nga ai hte langai hpang langai kap bra wa ai masa re lam, grau nna gaw masha law law hpawng chyawm nga ai hpyen koi yen dabang ni hta byin law nga ai masa hpe ya na zawn tsun dan ai.
“Masha law law nga ai re majaw marai langai machyi ai hte langai hpang langai hkan mchyi ai hku rai taw nga. Tsi mawan n hkum ai majaw kun mai tsai hkra n lu tsi ai masa rai sam ai. Hpyen yen dabang de KBC hte Kaba garum ningtum hpung ni hku nna gaw tsi mawan loi li madi shadaw ai lam gaw nga ai. Gara hku byin ai kun? Tsi sha ai hte mai ai nga tim bai machyi chyi re,” nga nna hpyen yen mung masha langai tsun ai.
Ya aten tsi rung tsi gawk ni de du wa ai machyi masha ni gaw hkali, waw machyi ai masha ni grau law nga ai re lam, dum nta langai kaw marai langai hkali, waw machyi ai hte nta ting kaw hkan kap bra ai masa byin nga ai lam chye lu ai.
Hkali ana byin shangun ai gaw Hkali Jigrawng ni re hte dai Jigrawng ni gaw shani ka-ang hkan kawa ai ni rai nna shani hkan Jigrawng n kawa hkra tinang hkum tinang makawp maga ra ai.
Shana yup aten sut hpe shim ai hku kang da ra na, dum nta makau grup yin san seng san pan lam hpe bat mi hta kalang daram lu galaw hkra galaw ra ai re hte kaga hkan nang hkan sa ra ai lam hte seng nna lit nga ai Jinghpaw hkam ja dap kawn mung n dau da ai re hpe chye lu ai.
Comentarios