Pajau Media
2.12.2024
Myen hpyen dap gaw hpyen yen mung masha ni shanu nga ai Nawng hkying hpyen yen dabang kaw December 2 ya shani Ka-ang daram hta shang wa nna Dabang lit hkam hpe shaga woi mat n htawm san jep ai lam ni galaw ai lam hpyen yen mung masha ni shana wa ai kaw na chye lu ai.
Dabang Up hpe shanhte San mayu ai san la nna Bai dat ai ya ai re hte Myen hpyen dap san jep ai masa hpe Hpyen yen mung masha langai Tsun ai hta
“ Dai ni sha Pala shinggang ai Palawng ma hpun da ai Myen hpyen la langai Camp kata de shang wa ai anhte na Dabang lit hkam hpe woi mat ai, Camp kata kaw gara hku nga ai, Shang lawt ni Shang n shang San jep ai, Dabang kata masha kade shanu ai jahpan ni san la mat ai, dabang sumla ni gayet mat ai ” nga nna Nawng hkying ginra Hpyen yen mung masha langai tsun ai re.
N dai laman Waimaw ginra kata Myen hpyen dap Hpyen n-gun jat shamu shamawt nga ai hta December praw 1 ya shani kaw nna Nawng hkying ginra hkawm sa lam ni hkan du hkra Myen hpyen dap ni shamu shamawt ai sha n-ga Hpyen yen dabang hkan du hkra shang jep wa ai majaw shimlum lam n nga wa sai nga nna mung tsun ai re.
“ Nawng hkying ginra gaw hpyen yen ni law malawng shanu nga ai hta Ya bai Myen hpyen dap ni shamu shamawt wa ai, Ya pyi hpyen mawdaw 7 daram hte shara la taw sai, ginra shimlum lam n nga ai sai, Majan bai byin yang gaw gara de yen ra na pyi n chye mat sai Hpyen yen mung masha ni grai myit tsang taw nga sai”
Waimaw ginra kata March 7 ya kaw nna hpang ai KIA pawng hpawm hpung ni a htu shadut majan hpang Myitkyina Manmaw lam mayan mare kahtawng hkan na Mung masha ni gaw Lak San La Sang Awng Uphkang ai Nawng hkying ginra de koi yen wa ai re hte Myen hpyen dap gaw Nawng hkying maga de N gun jat shamu shamawt wa ai majaw majan bai laja wa nna kalang bai gahtap yen ra na hpe grai myit tsang nga ma ai re.
Comments