Namti De Koi Yen Wa Ai Hpyen Yen Mung Masha Ni Ya Aten Malu Masha Tsi Mawan Ra Kadawn Nga

Pajau Media

April 11, 2025

Lawa mare de gasat gala majan byin ai majaw ginra masha n kau gaw Mogawng Mohnyin ginra de yen ai ni nga ai zawn n kau gaw Namti KBC nawku wang de koi yen wa ai rai nna koi yen mung masha ni hta malu masha hte tsi mawan ni ra kadawn nga ma ai re hpe mung chye lu ai.

N nan hpyen koi yen ai ten nam de shawng koi yen ai hta aten na yang nam kata kaw grau yak hkak wa mai ai majaw masha law ai ginra de koi yen wa ai re hte hpyen koi yen ai hta ma kaji, gumgai dingla law ai re majaw hkam ja lam a matu tsi mawan ni ra kadawn nga ai lam chye lu ai.

Hpyen yen mung masha ni hpe malu masha hte seng nna karum ningtum hpung ni karum jaw ai lam nga ai raitim dum nta masha law ai ni n law sha ai, masha law ai re majaw n dep n hkap ai zawn re ai mung lawm ai rai nna ya aten Namti ginra koi yen nga ai mung masha ni malu masha ni mung ra kadawn nga ai lam chye lu ai.

N dai hpang daw de hpyen koi yen mung masha ni hpe mungkan kawn karum jaw ai karum ningtum ni mung yawng dawm wa sai masa hta shaning na na koi yen wa sai hpyen yen mung masha ni gaw shimlum lam n nga ai lapran raitim buga de n htang wa ai ni law wa sai re hpe mung chye lu ai.

Namti kaw koi yen wa ai Lawa ginra masha ni gaw March shata 31 ya kaw nna mare de Myen hpyen dap du shang wa ai majaw hkrit tsang nna koi yen wa ai re hte April 5 ya shani she Namti ginra de htawt sit la lu ai re. Namti ginra de koi yen wa ai hpyen yen mung masha htinggaw 100 jan re lam chye lu ai.

Shiga – Pyilan U