Pajau Media
19th February, 2025
Mogawng, Nammati muklum na Kan La lambraw hta Sam Hkyeng P.T.Ts ni kawn laiwa laisa mung shawa ni hpe laja lana san jep ai lam ni galaw nga ai lam ginra masha ni tsun ai kawn chye lu ai.
“Mani jahpawt kaw na re, Myen hpyen hte Sam Hkyeng P.T.Ts ni laja lana jep wa ai. Mawdaw ni mung yawng ahkrawk jep ai. Cycle nga yang mung tools box kaw na hkawt hpaw shangun tam ahkrawk ai,” nga nna Nammati ginra masha langai tsun ai.
Mani February 18 ya jahpawt kaw na hpyen n-gun marai 10 ram nga ai Myen hpyen hte Sam Hkyeng pawnghpawng hpung ni kawn hpyen hkring hte hkrak sinat ni hte hkawmsa hkawmwa mung masha ni hpe laja lana san jep ai re lam chye lu ai.
Dai Kan La lambraw gaw Myitkyina-Mandalay lam hte Myitkyina-Tanai Ledo lam hkrum ai lambraw kaw re ai hte Mile 21 shagyit lai Nammati muklum shang wa ai Kyawk Tawng Kung (ကျောက်တောင်ကုန်း) shara hta mung myen hpyen n-gun 10 jan ram hte kalang lang san jep ai ni nga ai hpe mung ginra masha ni tsun ai re.
Dai sha n ga Nammati ginra hta Myen hpyen hpung ni kawn February 10 ya kaw na nta sagu mying jahpan hta nna hpyen magam gun na matu hpyenla nnan shaga ai lam ni galaw na matu shakut shajin nga ai lam ni hpe mung matut chye lu ai.
Ya na zawn hpyenla nnan shaga ai sha n ga myen hpyen dap gaw lambraw, lam kaba hkan dap dung shara la let laiwa laisa mung shawa ni hpe laja lana san jep ai majaw myit tsang nga ai lam ginra Masha ni tsun ai re.
Shiga - MK
コメント