Pajau Media Channel
22nd May, 2024
Putao ginra Sumpyi Yang mung masha ni hkying mi jan gaw nam de koi yen ai bat lahkawng ram rai wa sai hte ya aten hkyak hkyak garum ningtum ra kadawn nga ai lam hpyen koi yen mung masha ni tsun ai.
“ya aten hkyak hkyak gaw anhte Sumpyi Yang bu ni yawng nam hkan bra nga ga ai, kajawng kaja hprawng pru wa ai re majaw ya aten du hkra n lu gahkyin la ai, bat lahkawng rai wa sai, hkyak hkyak hprawng pru wa ai re majaw ahkyak ai lam ni law law re, Hkrun lam ni mung yawng pat da ai re hte gara de mung garum hpyi n mai yak hkak nga ga ai, grau nna gaw malu masha, palastic muga hte tsi mawan ni ra ahkyak nna yak hkak nga ai ” nga nna Sumpyi Yang hpyen koi yen mung masha tsun ai.
Putao Sumpra Bum makau Sumpyi Yang mare masha ni gaw lai wa sai May 12 ya kaw nna Putao maga de na yu wa ai Myen hpyen hpung ni gaw Wa dat mare masha ni hpe hpyen ninggang shatai nna rim woi ai lam ni nga ai lam shiga na ai hte hkrit tsang nna hprawng yen hkawm mat ai re.
Ya aten Sumpyi Yang mare kata kaw nan gasat gala majan byin ai lam n nga ai raitim mung masha hkying mi jan gaw mare de mung n gwi shang wa rai nna nam kata kaw sha koi yen nga ma ai rai nna ya aten malu masha, nga shara ginsum gaw gap na matu Palastic ni, tsi mawan ni grai ra ahkyak nga ai re hpe mung chye lu ai.
Putao maga de na hpyen garum yu wa ai myen hpyen dap hte P.T.Ts pawng hpawm hpyen hpung ni gaw May 19 ya shana daw hta mung masha dum nta 3 wan nat kau ya ai rai nna mare kata nga manga du sat yam nga ni hpe kam ai hku sat sha nga ai re lam mung chye lu ai. May 14 ya hta mung asak 60 ning re ai amyu shayi hte rau marai 3 hpe Myen hpyen dap kawn rim da ai kaw na hprawng pru wa ai hta asak 60 ning re ai hpaw mi gaw hka yawng si mat ai lam nga ai re hpe mung chye lu ai.
Mare kata kaw Myen hpyen hpung ni dap jung shara jahkrat nga ai re sha n-ga mare de arai wa la ai mung masha ni hpe mung rim jep adup gayet ai lam ni nga ai majaw mare de bai n gwi shang wa nna nam hkan sha nga ai re lam chye lu ai. Ya aten Sumpyi Yang mare makau grup yin hta KIA, PDF, KPF pawng hpawm hpyen ni hte myen hpyen dap lapran hpyen masa shaja hkat nga ai masa re sha n-ga shani shagu ngu na daram gap gasat ai lam ni nga ai re hpe mung chye lu ai.
Shiga - Mali Hku
Comments