Nam De Koi Yen Ai Lawa Mare Masha Ni Hkamja Lam Hte Malu Masha Yak Hkak Wa

Pajau Media

4.4.2025

Dainai Lido lam Lawa mare de Myen hpyen dap wa shang nga ai majaw nam de hpyen koi yen mat ai Lawa mare masha ni hta ma kaji ni, gumgai dingla ni machyi makaw hkam ja lam n nga wa ai majaw mare de bai shale la nna hpyen yen shara htawt sit na hkyen ai lam Lawa mare masha langai tsun ai.

“Lawa mare kaw na mare masha yawng hprawng yen ai ga re. Mare kaw gaw nta sin ai daram sha re sai, ya anhte Lawa Lagawng mare masha ni gaw bat mi daram nam kaw makoi nga ga ai. Ya aten na wa ai rai yang ma ni, gumgai dingla ni hkam ja lam n nga wa re ai hta n-ga lu sha ni mung yak wa re ai majaw ya dai ni mare de bai shale la nna hpawt ni hkan Namti Wa Awng buga de htawt sit na matu hkyen nga ai,” nga nna tsun ai re.

Myen hpyen dap P.T.Ts pawng hpawm hpung ni gaw March 31 ya shani Lawa mare de uhpung hku du shang wa ai majaw mare masha ni gaw nam maling de koi yen ai ni nga ai zawn n kau gaw Namti, Mogaung ginra ni de koi yen hkawm ai ni law malawng re lam chye lu ai.

Lawa mare kaw wa shang nga ai Myen hpyen hpung ni hpe KIA pawng hpawm hpyen hpung ni kawn April 2 ya hta htim gasat gawt shapraw kau lu sai re. Ya aten nam de koi yen ai ni mung aten na wa yang grau yak hkak wa na tsang ai majaw masha law ai ginra de bai htawt sit na matu galaw wa ai re hpe mung chye lu ai.

Lawa ginra kata Mung masha htinggaw hkying lam shanu nga ai re hte ya aten nam de koi yen ai ni gaw htinggaw latsa grup yin re hte ya aten hkam ja lam malu masha karum ningtum ni mung ra kadawn nga ma ai re hpe mung chye lu ai.

Shiga – Pyilan U