N Shung Ladaw Shang Wa Ai Hte Maren Ya Aten Labang Kahtawng, Mali Yang Ginra Nga Mung Masha Ni Hpun Nba Hte Palawng Lum Ni Hkyak Hkyak Ra Kadawn Nga

Pajau Media

24.10.2024

Ya aten Labang Kahtawng hte Mali Yang mare hkan koi yen nga ai hpyen yen Mung masha hkying lam a matu Malu Masha, Hpun Nba hte Palawng Lum ni hkyak hkyak ra kadawn nga ai lam chye lu ai.

Du hkra ladaw galai shai wa ai masa hta n shung ladaw shang wa ai majaw Palawng Lum hte Hpun Nba ni sha n-ga Malu Masha, Tsi Mawan hte n-gun rawng ai malu masha ni mung grai ra ahkyak nga ai lam chye lu ai.

Labang Kahtawng mare kaw hpyen koi yen wa ai Mung masha ni gaw lai wa sai March (7) ya shani KIA pawng hpawm hpung ni a htu shadut htim gasat majan a majaw Awng Mye (1),(2) hte Shwe Nyawng Pin mare kaw nna hpyen yen 600 jan hte April praw laman gasat gala majan a majaw Wuyan mare kaw nna koi yen wa ai Mung masha 100 jan gaw Mali Yang mare kaw koi yen nga nna Ja Bu hpyen yen dabang hta 200 daram shanu nga ai re lam chye lu ai.

Ya aten hpyen koi yen Mung masha ni gaw Mali hka mayan shanu nga ai re majaw Mali hka n bung katsi dingyang na ahpawt ai sha n-ga n shung ladaw shang wa sai re majaw grau grau kashung wa ai hta hpun n ba n lu ai mayak ni hkrum katut nga ai re hpe mung chye lu ai.

Hpyen yen aten ladaw na wa sai hte maren hpyen yen Mung masha ni hta mlau masha tsi mawan dum hprut wa ai hte tinang ginra buga de n htang wa mayu tim ya aten na masa hta grai yak hkak nga ma ai re lam chye lu ai.