Pajau media
26.3.2025
Miwa jarit lam naw pat da ai majaw n-ra wan n-ga hpaga galaw ai Man Win Gyi ginra masha ni n-ra n lu dut ai majaw grai yak hkak nga ma ai lam chye lu ai.
Man Win Gyi ginra hta nga ai hpyen koi yen mung masha ni hte ginra masha n kau gaw n-ra wan n-ga ju nna Miwa de dut shalai hpaga galaw ai re, raitim Miwa jarit chyinghka pat da ai re majaw n-ra buk ni hpe n lu shalai ai re lam ginra masha langai tsun ai re.
“ Hpyen koi yen mung masha ni hte ginra masha n kau gaw nam de n-ra wan n-ga ju nna shang gumhpraw tam nga ma ai re, ya gaw wa n-ga hpe kadai mung n mari ma ai, gumhpraw tam mung grai yak mat sai, grai myit tsang hpa re sum na hku she rai sai” nga nna tsun ai re.
N-ra wan n-ga hpe madung gaw Miwa de shalai ai re, Jarit shagyit ni pat da ai sha n-ga ginra kata mung hpun wan hpe she madung jai lang ma ai majaw Wan n-ga mari ju ai masha n nga ai daram re mat ai lam matut tsun dan ai re.
“ Wan n-ga ni hpe Miwa de shalai na matu sha madung re, n dai hkan gaw hpun wan hpe sha madung lang ma ai hpaga masha ni gaw Miwa de shalai na matu mari ma ai re, ya gaw hpaga ga ai masha ni mung nau n mari mat sai, ya gaw n-ra dingyang ju ai ni pyi n ju ai madang re sai ”
Miwa jarit kaw n shalai ai majaw mari mahkawng da ai n-ra buk ni mung jan nga ai re hte n-ra ju dut masha ni mung grai yawm mat sai re lam chye lu ai. Lai wa sai ten hta gaw n-ra Ton mi hpe Miwa Yun 2,000 manu lu ai hte Myen gumhpraw hku rai yang 1,200,000 lu ai re. Miwa shagyit n nan pat wa ai aten hta gaw Yun 1,700 daram sha lu mat ai hte ya aten 1,050 shayawm dut tim kadai n mari mat ai lam chye lu ai.
Myen mung hkran maga de miwa de shalai na matu sum bum da ai n-ra wan n-ga buk ni gaw hten wa ai ni lawm wa ai re, Hpaga masha langai gaw n-ra wan n-ga tan Mun hku mari mahkawng da ai re hte n kau gaw wan n-ga sumbum shara lamu ga shap nna tawn da ra ai masa hta ya na zawn bai nlu dut ai re majaw hpaga masha ni hta sum machyi ai lam law law byin nga ai lam chye lu ai.
Man Win Gyi ginra hta palawng Ding Sa, Hka Kan hte Sam Sar ginra ni hta madung wan n-ga ju ma ai re hte laning mi tup ngu na daram n-ra ju ai raitim Miwa jarit pat ai manghkang a majaw March 20 ya kaw nna hkring mat sai re hpe mung chye lu ai.
Shiga- Zau Mai
Comments